​​Улаан-Үдэдэ эрхим һурагшадай партанууд дээрэ Эсэгын дайнай эрэлхэг баатарнуудай нэрэнүүд мүнхэлэгдэбэ

Буряад Уласай Болбосоролой ба эрдэм ухаанай яаманай сайтһаа абтаһан гэрэл зураг

Байгша оной сентябриин 3-да Улаан-Үдэ хотын 52-дохи һургуулида “Геройн парта” гэһэн Бүхэроссиин түсэл эхиеэ абаба. Бүхыдөө уласай һургуулинуудта 50 парта һуралсалай шэнэ жэлэй түрүүшын үдэрнүүдтэ Эсэгэ ороноо хамгаалгын Агууехэ дайнай Геройнуудай гэрэл зурагуудаар, намтар ба дайшалхы замайнь зураглалнуудаар “хангагдаха” юм. Агууехэ Илалтын 75 жэлэй ойдо дашарамдуулагдан, Геройн партанууд Эсэгэ ороноо хамгаалгын Агууехэ дайнай орденой зурагаар шэмэглэгдэнхэй.

- Мүнөөдэр ехэ удха шанартай үдэр гээшэ. Бидэ түрүүшын Геройн - СССР-эй Герой, гвардиин полковник Владимир Бузинаевич Борсоевой парта нээхэмнай. Энэ түсэлэй ашаар һурагшад нютагаархидайнгаа баатаршалга тухай мэдэжэ абаха, - гэжэ Буряадай Болбосоролой ба эрдэм ухаанай яаманай Эхэ орондоо үнэн сэхээр хүмүүжүүлгын, аяншалгын ба тамирай түбэй захирал Даша Кырмыгенов хэлээ.

Буряад Уласай Болбосоролой ба эрдэм ухаанай яаманай сайтһаа абтаһан гэрэл зураг

Геройн парта дээрэхи хабтаһан гар утаһаар таниха QR-кодтой юм. Тэрээгээрнь һурагшад тусхай сайтда орожо, дайнда хабаадаһан эрэлхэг баатар нютагаархин тухай мэдээсэлтэй танилсаха аргатай.

Геройн партын саана һуралсалдаа, тамирай ба урлалай талаар шалгарһан һурагшад номоо үзэхэ эрхэтэй. Иимэ эрхэдэ хүртэһэн түрүүшын һурагшадай нэгэн хадаа Улаан-Үдын 52-дохи һургуулиин кадедүүдэй ангиин һурагша Елизавета Бронникова болоно. Тэрэ ганса “5” дээрэ һурадаг, “На крыльях таланта” гэһэн Бүхэроссиин конкурсын I шатын дипломант юм.

Энгэ түсэл 2017 ондо “Ниитэ нэгэн Росси” гэһэн намай “Шэнэ һургуули” гэһэн түсэлэй хэмжээндэ Красноярска хизаарта бэелүүлэгдэжэ эхилээ һэн гэжэ һануулая.

Буряад Уласай Болбосоролой ба эрдэм ухаанай яаманай сайтһаа абтаһан гэрэл зураг