Намарай эхин һарын нэгэнэй мэдээгээр “Алас Дурнын гектар” гэһэн программаар Буряад Уласайнгаа дэбисхэр дээрэ газар абаад, ажал хэхэ, ажабайдалаа түхеэрхэ, ажахы эрхилхэ зорилготойгоор 1335 нютагаархиднай мэдүүлгэ барижа, засагай зургаануудта хандаһан байна.
Хүн бүхэн абаха аргатай
Энээн тухай Буряад Уласай Эд зөөриин болон газарай харилсаануудай яаманай газар бүридүүлгын болон газар ашаглалгын таһагай дарга Дмитрий Булнаев мэдээсэбэ.
“Алас Дурнын гектар” гэһэн программа манай уласта августын эхинһээ бэелүүлэгдэжэ эхилэнхэй. Засагай зургаануудта, гүрэнэй болон нютагай засагай туһа хангамжа үзүүлхэ талаар уласай олон һалбарита түбэй (МФЦ-гэй) аймагуудтахи һалбаринуудта, аймагуудай захиргаануудта гектар газар абаха тухай мэдүүлгэ бариһан табан эрхэтэдтэй газарай участогуудые түлөөһэгүйгөөр ашаглаха тухай хэлсээнүүд баталагдаад байна. Тарбагатай аймагта 4 хүнтэй, Загарайда - 1 хүнтэй.
Мэдүүлгэ бариһан зондо газар үгэхэгүй гэжэ шиидхэбэри мүнөө дээрээ абтаагүй. Юундэб гэхэдэ, хүн бүхэн абахаяа һанаһан газарайнгаа зураг мэдүүлгэдэ хабсаргажа үгэхэ гуримтай юм. Хаана байһан участок бэ гэжэ тэндэнь хараатай байха ёһотой. Тэрэ зурагыень тусхайта албан шалгажа, зэргэлээд байһан газартаяа зураг дээрээ дабхасанхай гү, али үгы гү гэжэ заатагүй элирүүлдэг. Мүн баһа өөрсэ аргаар хэрэглэгдэхэ дэбисхэр бэшэ бэзэ гээд мэдэгдэдэг. Хэрбэеэ тиимэ байгаа һаань, энэ ажал ябуулдаг албан мэдүүлгэ бариһан хүндэ ондоо, хамаг эрилтэнүүдтэ таарама, сүлөө газар абахыень дурадхана. Энэ ушарта мэдүүлгэ бариһан эрхэтэн тэрэнииень абаха, үгыгөө өөрөө шиидэдэг. Арсаал һаань, тэрэ хүндэ газар үгтэдэггүй. Гэхэтэй хамта, гектар газар абаха эрхэнь тэрэ хандагшада үлэнэ.
Нэгэ хүн наһан соогоо нэгэл дахин түлөөһэгүй иимэ газар абаха эрхэтэй. Тэрэнь нэгэ гектарһаа үлүү ехэшье, багашье байха ёһогүй. Ганса гансаараашье, 10 хүрэтэр хүнүүдтэй хамтараадшье мэдүүлгэ барижа, зэргэлээд байһан газарнуудые абахадань болоно гээд уласаймнай Эд зөөрин болон газарай харилсаануудай яаманай мэргэжэлтэд тайлбарилба.
Байшан бариха дуратайшуул олон
Мүнөө дээрээ ороод байһан мэдүүлгэнүүдые харахада, ниислэл хотодомнай дүтэ оршодог Ивалга, Загарай, Тарбагатай аймагуудта эгээл олониинь ороһон байха юм. Мүн баһа Байгал далайн эрьедэ байдаг Кабанскын аймагта газар абаха дуратайшуул олон.
Ямар зорилготойгоор, юу хэхэеэ нютагаархиднай газар эринэб гэһэн асуудалдамнай яаманайхид харюусахадаа, нэн түрүүн гэр байра барихаяа һанаһан зониие онсолон тэмдэглээ.
Үмсын ажахы эрхилхэ дуратайшуул, хүдөө ажахыда ажал хэхэеэ һанагшад мэдүүлгэнүүдые элбэгээр бариһан байха юм.
Түхэреэн жэл соо һанажа үзэхэ
Энэ программын бусадһаа онсо илгаань гэхэдэ, абаһан газар дээрээ юу хэхэеэ жэлэй туршада элирхэйлжэ шиидэхэ арга боломжо бии. Хэрбэеэ анхандаа, мүнөөшье энэ программын дүримөөр бэшэ, юрын мэдүүлгээр газар абахадаа, тэрэниие яажа ашаглахаяа уридшалан мэ- дүүлжэ бэшэдэг һааб даа. Харин “Алас Дурнын гектар” абаһан хүн бүхэн тэрэнээ түлбэригүйгөөр ашаглаха тухай хэлсээ баталһанайнгаа удаа түхэреэн жэлэй туршада бодожо үзөөд, 12 һарын хүсөөгүйдэ яажа тэрэ газараа ашаглахаяа шиидэдэг. Тиигээд хандаһан тусхайта албандаа бэшэмэл аргаар заатагүй дуулгаха ёһотой. 10 хоногой туршада тэрэнииень хаража үзөөд, мэдүүлгэ абаһан албанайнь өөрынгөө данса баталжа, Росреестр руу эльгээхэдэнь, хайшан гэжэ хэрэглэгдэхэ аргыень газар бүридэлдэ оруулдаг гүрэнэй тобьёг руу бэшэгдэхэ болоно. Табан хоногой туршада иимэ ажал бүтэхэ ёһотой. Урид баталагдаһан хэлсээндэнь хабсаргалта боложо, хожомынь газараа ондоогоор ашаглахаяа һанаа һаань, тусхай хубилалтануудые оруулхаар.
Абаһан газар дээрээ хууляар хоригдоогүй ямаршье ажал эрхэтэн хэхэ аргатай. Тусхай зүбшөөл, гэршэлгэ, бүридхэл хуулиин ёһоор абтаха ёһотой байгаа һаань, хубиин олзын хэрэг эрхилхэеэ һанаһан зон тэрэ эрилтэнүүдтэнь тааруулжа хэрэглэхэ юм ааб даа.
Гэрһээ гарангүй, газартай болохоор
Холбоото уласай мэдээсэлэй системэ хэрэглэжэ, “Алас Дурнын гектар” абаха дуратайшуул мэдээсэлэй «НаДальнийВосток.РФ» системэдэ мэдүүлгэ сахим аргаар бариха ёһотой. Саарһан дээрэшье бэшээд, газар хубаажа, зондо үгэдэг гүрэнэй болон нютагай засагай зургаан руу өөрөөшье абаашажа үгэхэдэ, шуудангааршье (почтоор) эльгээхэдэ болоно.
Газарые үмсэлһэн тухай шиидхэбэри бүридхэдэг федеральна албанда, гүрэнэй болон нютагай засагай туһа хангамжа үзүүлхэ талаар уласай олон һалбарита түбэй (МФЦ-гэй) хото, хүдөөгэй һалбаринуудта хандахада болохо юм. Мэдүүлгэ оруулһанай, албан тушаалтадай тэрэниие хаража үзэһэнэй түлөө түлбэри үгы.
Мэдүүлгэ дотор хандагшын нэрэ, обог, алдар, ажаһуудаг газарынь болон бусад дансануудтань байһан мэдээнүүд оруулагдаха ёһотой. Мүн тиихэдэ абахаяа һанаһан участогайнь газарай бүридхэлдэ оруулагдаһан дугаар (шэнээр бүридхэгдэхэ газар бэшэ һаань), тэрэнэй ута, үргэнэйнь хэмжүүр, хаанаһаа үгтэхэеэ байһан тухай мэдээн заатагүй бэшэгдэһэн байха зэргэтэй юм гэнэ. Мэдүүлгэдээ паспортын хуулбари, шэнээр бүридхэгдэхэ ёһотой һаань, газарай зураг хабсаргажа үгэхэ хэрэгтэй.
Газарай асуудалнуудые шиидхэдэггүй засагай тад ондоо зургаанда мэдүүлгын ороһон байгаа һаа, тэрэ зургаан гурбан хоногой туршада тэрэниие хэрэгтэй газар руунь өөрөө эльгээгээд, хандагшада бэшэгээр дуулгаха уялгатай.
“Алас Дурнын гектар” абаха тухай мэдүүлгэ бэшэһэн хүндэнь бусааха шалтагай үгы һаа, уялгалагдаһан зургаан ажалай 20 үдэрэй туршада тэрэниие хаража үзөөд, нэгэ гэбэл газар үгэхэ, үгы гэбэл, үгэхэгүй тухай шиидхэбэри абаха болоно. Энэ дүрим хадаа үгтэхөөр бэлэн болонхой, тусхай дансатай газарнуудта хабаатай юм. Хэрбэеэ шэнээр бүридхэжэ, гүрэнэй бүридхэлдэ табигдаха газар байгаа һаань, бүхы дансануудайнь бүтэхэ болзор тэрэл 20 үдэрэй туршада элирхэйлэгдэдэг.
Эрхэтэн бүхэн эрхэтэй
“Алас Дурнын гектар” гэһэн программаар манай гүрэнэй эрхэтэн бүхэн нэгэ гектар газар Алас Дурна зүгтэ абаха аргатай.
Манай Буряад Уласта ажаһуудаг хүнүүд ганса эндээ бэшэ, Алас Дурнын федеральна тойрогой 9 нютаг можын дэбисхэр дээрэ түлөөһэгүй газар абаха эрхэтэй. Амарай, Еврейн бэеэ дааһан, Магаданай, Сахалинай можонуудта, Камчаткын, Примориин, Хабаровскын хизаарнуудта, Саха (Яхад) Уласта, Чукоткын бэеэ дааһан тойрогто һуурижаха дуратайшуул манайшье эндэ олдожо магад.
Харин байгша оной августын 1-һээ эхилжэ, 2020 оной февралиин 1 болотор ганса эндээ ажаһуудаг зон Буряад Уластаа газар бусадһаа түрүүн абаха аргатай. Тэрээнһээ сааша Алас Дурнын тойрогой алишье нютаг можодо ажаһуудаг зон эндэмнай ерэжэ, газар эзэлжэ түбхинэхэ аргатай байха. Харин ерэхэ жэлэй августын 1-һээ бүхы Россиһаа зон ерэжэ, газар абадаг болохо юм. Тиимэһээ нютагаархиднай мэдүүлгэ уридшалан барижа, түрэһэн тоонто газараа эзэлжэ абаха шухала гээд һануулха дуран хүрэнэ. Миинтээр абтаһан газарайнгаа түлөө 5 жэлэй туршада татабаришье түлэхэгүй юм.
“Алас Дурнын гектар” абаха тухай асуудалнуудаар тусхай албануудта хандахада, бэлэн. Интернет сүлжээндэхи сайтнууд дээрэнь орожо, харюу бэдэрхэдэ болоно. Аймаг бүхэндэ нээгдэһэн МФЦ-гэй һалбаринуудта, аймагуудай нютагай засагай захиргаануудта хандаад, хэрэгээ бүтээхээр.
Анна Огороднигой гэрэл зураг