​​Зэдын малшадые зүбшэжэ дэмжэхэ

Зэдэ аймагай Борьёо нютагай захиргаанай хүтэлбэрилэгшэ Эр­дэм Сагалеевэй үүсхэлээр хүдөө ажахын хамжаануу­дые байгуулха асуудалаар суглаан үнгэрөө.

Энэ һуурин жэл бүри һэргэжэ, шэнэ барилгану­уд хэгдэжэл байна. Хүн зон хүдөө ажахыда гол анхарал табидаг болонхой, малша­дай аяар 17 бууса баринхай. Эрдэм Сагалеев хүдөө ажа­хын шэглэлэй хубаари газар­нуудые бүридхэлдэ оруулжа, үнэмшэлгэтэй болгохо тухай элидхэбэ. Мүнөө энэ нютаг­та 4 КФХ бии болгогдонхой. Мүн хүдөө ажахын шэглэ­лээр үмсын хэрэг эрхилэг­шэдтэ гүрэнэй талаһаа ямар дэмжэлгэ үгтэнэб, хайшан гээд ажахыгаа хүгжөөхэб, ямар аргаар бухгалтерай то­осоо хэжэ байхаб гэхэ мэтын асуудалнууд энэ суглаанда зүбшэгдэбэ. Нютаг дээрэнь фермер болоһон зон хони мал үсхэбэрилгэдэ субсиди абаһан дүршэлөөрөө хубаал­дабад.

Буряад Уласай Хүдөө ажахын яаманай дэргэдэхи Мэдээсэлэй-методологиин түбэй дарга Аюна Цыренжа­пова арад зоной һонирхоһон асуудалнуудта тодорхой ха­рюунуудые үгэбэ. Хайшан гэжэ техникэ, мал худалда­жа абаад, гүрэнэй дэмжэл­гэдэ хүртэхэ, субсиди абаха тухай асуудал бүгэдэниие һонирхуулна. Фермер бо­лоод, хүдөө ажахын коопе­ратив-хамжаануудые нээхэ һанаатайшье һаа, тоосоо хэхэ асуудалһаа олонхи зон хашарна, зүрхэлнэгүй.

- Энэ аймагта манай түбэй мэргэжэлтэнэй һуури хэрэг­тэй болоод байна. Теэд ажал­та һуури байгуулха хэрэг мүнгэнэй асуудалда тороно. Манай түбэй мэргэжэлтэд фермер болон хүдөө ажахын шэглэлэй үмсын хэрэг эрхи­лэгшэдтэ бүхы тоосооень ямаршье түлөөһэгүйгөөр хэжэ үгэхэ аргатайбди, - гэжэ Аюна Заяновна тэмдэглээ.

Гэхэ зуура, ганса бухгал­терай тоосоо бүридхэжэ үгэхэ бэшэ, мүн гүрэнэй грантын дэмжэлгэдэ хүртэхэ талаар данса суглуулха, то­осоо хэхэ асуудалнуудаар баһа тус түбэй мэргэжэл­тэд туһалдаг бшуу. Мүн һуралсал, семинарнуудые эмхидхэдэг. Зэдэ аймагта энэ түбэй мэргэжэлтэн хэрэгтэй гэжэ бүгэдэ мэдэрнэ.

Гүрэнэй үүлтэр һайжаруулгын албанай мэргэ­жэлтэд энэ суглаан дээрэ элидхэхэдээ, Борьёо нютаг дээрэ бодо мал хэмэл аргаар үрэжүүлгын таһаг байгуулха тухай мэдээсэбэ. Ородой Хол­боото Уласай Хүдөө ажахын яаманай дэмжэлгээр хэмэл аргаар үрэжүүлгын гарза га­рашын 95 хубинь һөөргэнь бусаагдадаг байна. Саг үргэлжэ шуһа холижо, малай үүлтэр һайжаруулгын ажал хэхэдэ, мал ажахыда тон үрэ дүнтэй гэжэ эли. Тиимэһээ хэмэл аргаар үрэжүүлгэ ябу­улдаг мэргэжэлтэн эндэ хэ­рэгтэй.