Мүнөөдэрэй байдалаар Буряад Уласай хүдөө ажахыда бүхыдөө 401 мянган гектар талмайда үбһэ ногоон сабшагданхай, 396 мянган гектар хуряагданхай, энэнь хараалагдаһан түсэбэй 93 хубинь болоно. 553,5 мянган тонно үбһэн нөөсэлэгдэнхэй.
Үбһэ, тэжээл бэлдэлгэ
Бүхыдөө улас дотор нэгэ гектар талмайһаа жиирэй 15 центнер үбһэн абтана. Эгээл элбэгээр Бэшүүр аймагта – 21 центнер, Түнхэндэ - 20,5, Ивалгада – 19, Тарбагатайда – 18,6 центнер абтаа. Харин Баунтын аймагта - 9,3, Яруунада – 9,8, Кабанскда – 10,5 центнер абтаа.
- Мүнөөдэрэй байдалаар Буряад Уласай 5 аймагта, тодорхойлбол, Бэшүүр, Зэдэ, Кабанск, Мухар-Шэбэр, Тарбагатай гээд, тус тустаа 15 мянгаад тонно бэлдэжэ, түсэбэйнгөө 95,5 хуби дүүргэнхэй. Нёдондо энэл хирэдэ дурдагдагша аймагууд 12,4 мянган тонно үбһэ нөөсэлөөд байһан юм. Бэшүүр ба Мухар-Шэбэр аймагуудта түсэблэһэнһөө үлүүгээр бэлдэжэ байна, - гээд Буряад Уласай Хүдөө ажахын яаманай ургамалай таһагай дарга Владимир Вахрунов мэдээсэбэ.
Уласай ажахынууд нарин тэжээл бэлдэлгээр түсэбөө үлүүлэн дүүргэжэ байнхай. Мүнөөдэрэй байдалаар, Ярууна аймагта 240 мянган тонно силос нөөсэлэгдөөд байна, гадна Кабанскын, Мухар-Шэбэрэй ажахынуудта эршэмтэй ажал ябуулагдана. Кабанскын “Байкальское” ажахы - 3,9 мянган тонно, “Рубин” – 4,3 мянган тонно, “Твороговское” – 2,4 мянган тонно, мүн Мухар-Шэбэрэй Түгнын ажахы 1,7 мянган тонно бэлдээд байна. Энэ тоо баримтаар тобшолходо, нэгэ толгой бодо малда мүнөөдэрэй баримтаар 7,4 центнер тэжээл бэлдэгдээд байна. Энэ тоо нарин тэжээл ба үбһэ бэлдэлгын баримтануудай үндэһөөр гаргагдаба.
- Ургаса хуряалгын дүүрэһэнэй һүүлээр бүрин тоосоон хэгдэхэ. Зарим ажахынуудта нёдондо бэлдэһэн үбһэ тэжээлынь үлэнхэй. Тиимэһээ мүнөө жэлдэ нэмэжэ нөөсэлөөд, ядамаггүй үбэлжэхэ байхабди, - гэжэ Владимир Вахрунов тэмдэглэнэ.
Уласай бүхы аймагуудай ажахынуудта малай тэжээл бэлдэлгэ түгэсхэлдөө хүрэжэ байна. Зарим тээгүүр, жэшээнь, Баргажан, Аха, Байгал шадарай, Хори аймагуудаар түсэбөө үлүүлэн дүүргэжэ байнхай. Бусад нютагууд тэжээл бэлдэлгынгээ ажал үргэлжэлүүлжэ, олон жэлэй ногоо сабшажа нөөсэлнэ.
Хартаабха болон огородой эдеэн
Буряад Уласта хартаабха болон бусад огородой эдеэн суглуулагдажа байна. Бүхы ажахынуудаар дүн хамта 6457 гектар газар дээрэ хартаабха малтагдаад байна. Нэгэ гектар газарһаа дунда зэргэ 159 центнер абтанхай. Сентябриин 18-ай байдалаар 188 гектар талмай дээрэһээ огородой эдеэн хуряагдаа. Ивалга аймагта 133 гектар талмай дээрэһээ 3608 тонно абтаа, энэнь түсэбэй 33 хуби болоно. Байгал шадарай аймагта 28 гектар талмайһаа 1032 тонно овощ абтаа - түсэбэй 16 гаран хуби болоно. Загарай аймагта 11,5 гектар дэбисхэр дээрэһээ 260 гаран тонно хуряажа, түсэбэйнгөө 16 гаран хубиие дүүргээд байна.
Таряа хадалга
Баргажан, Бэшүүр, Кабанск, Хурамхаан, Мухар-Шэбэр, Байгал шадарай, Түнхэн, Тарбагатай аймагуудта таряа хадалга эхилэнхэй. Мүнөөдэрэй байдалаар, 5692 гектар талмай унагаагдаад, 9995 тонно орооһон абтанхай. Тодорхойлходо, шэниисэ - 7,7 мянган тонно, обёос- 498 тонно, ешмээн - 1,1 мянган тонно, тритикале – 532 тонно, хара таряан – 36 тонно, горох - 80 тонно хуряагданхай. Эгээл һайн ургаса Тарбагатай аймаг - гектарһаа 20,9 центнер, Бэшүүр аймаг - 16,7 центнер, Кабанскын аймаг – 15,9 центнер абаад байна. Буряад Уласай бусад аймагууд бултадаа эдэ үдэрнүүдтэ таряа хадалгада гараха. Уларилай шэнжэһээ бүхы ажал дулдыдана гэлтэй.
Шухала асуудал
Намарай ургаса хуряаха асуудалай хажуугаар абаһан ургасаяа һайнаар хадагалха гээшэ баһал шухала бшуу. Тиимэһээ ажахынууд ургасаяа хадагалха тусхай байрануудые бэлдэжэ байна. Энэ асуудалда гол анхаралаа хандуулха хэрэгтэй гэжэ Буряад Уласай Хүдөө ажахын яаманай ургамалай таһагай дарга онсолно.
Нёдондо Ородой Холбоото Уласай хүдөө ажахын хиналтын албан энэ асуудалаар зорюута шалгалта үнгэргэжэ, дутуу дундануудые элирүүлһэн байна. Гол түлэб эрилтэдэ таараагүй газарта орооһо таряан хадагалагдана, мүн таряа хадагалдаг газарта бусад нобшо ноохой, элдэб ондоо хэрэгсэлнүүд суг хадагалаатай байгаа. Таригдаха орооһон зүб мүрөөр хорлогдоогүй болон саг үргэлжэ таряан хадагалдаг газарнууд шалгагдадаггүй байһаниинь элирүүлэгдэһэн байна. Иимэ дутуу дундануудые усадхажа, һайнаар орооһо таряагаа хадагалха тухай Хүдөө ажахын яаманай мэргэжэлтэд һэргылнэ.