898
Буряад Уласай Үндэһэнэй номой санда буряад хэлэнэй үдэрнүүдэй хэмжээндэ «Поклон Великой Святыне» гэһэн Джарун Хашарай субарга тухай баримтата фильмтэй танилсалга үнгэргэгдөө.
Хэжэнгэ аймагай гайхамшагта субарга тухай хахад часай туршада буряадаар энэ фильмдэ «Великая ступа Джарун Хашор: история и современность» гэһэн номой автор-согсологшо Соёлма Бадмаева хөөрэнэ. «Үндэр» гэһэн видеостудида фильм буулгагдаа гээд тэмдэглэлтэй. Фильм буулгалгада автор – Владимир Ширапов, оператор – Михаил Цыренов, Монтаж, компьютерна графика – Николай Елизов, аэросъёмконууд – Баир Эльвира Шойдоковтон, продюсер - Соёлма Бадмаева, диктор – Даши-Доржо Болотов гэгшэд хабаадаа.
Джарун Хашарай субаргын түүхэ, тэрэндэ хабаатай үльгэр домогууд тухай түүхэ шэнжэлэгшэд, ламанар, Хэжэнгэ аймагай ажаһуугшад хөөрэнэ. Агуу ехэ Субаргын барилга 1915 ондо эхилжэ, дүрбэн жэл барилга ябуулагдаа. Джарун Хашарай субарга хадаа Непалай «Бодхнатх» субаргада адли юм. Тэрэ Будда Кашьяпын үедэ манай ээрын урда тээ III зуун жэлдэ баригдаһан гэжэ домогтой. Непал хэлэнһээ оршуулхада, хэлэһэниие бусаахагүйш гэһэн удхатай. Түбэд хэлэнһээ «хүсэлнүүдые бэелүүлдэг субарга» гэжэ оршуулагдана.
1937 оной шэмэрүүн саг эхилжэ, Джарун Хашарай субарга, Хэжэнгын дасан һангаргагдаа. Тиигэбэшье арад зон гайхамшагта субарга тухайгаа мартаагүй. Буряад Уласай Засагай газарай дэмжэлгээр, арад зоной, олониитын хүсөөр шэнээр бодхоогдоожо, 2001 оной октябрь һарада рамнайлагдаа
100 жэлэй ойн баярта субарга һэльбэн шэнэлэгдэжэ, Ородой Холбоото Улас дотор эгээл томо субаргада зорюулагдаһан найр үнгэргэгдөө.
Буряад Уласай соёлой яаманай мэдээсэлэй албанһаа видеобуулгабари абтаба
«Буряад уласта буряад хэлэ сахин хүгжөөлгэ» гэһэн гүрэнэй программын хэмжээндэ фильм буулгагдаа.
Буряад Уласай Засагай газарай мэдээсэлэй яаманай гэрэл зураг
