​Уран зохёолшод тухай урматай дорюунаар

Буряад хэлэнэй габшагай һарын үдэрнүүдтэ Ивалга аймагай Гүрэльбэ һууринай шэнэ һургуулиин дэргэдэ эрдэм шэнжэлгын хуралдаан үнгэргэгдэбэ. «Буряад-монгол уран зохёол» гэһэн гаршагтай хэмжээ ябуулгада Ивалга болон Загарай аймагуудай үхибүүд хабаадаа. Мүн Монголһоо хэдэн хүбүүд, басагад ерэжэ, хэмжээе уласхоорондын шатада гаргаа.

Хани харилсаанай эхин

Һужаагай дунда һургуулиин буряад хэлэнэй багша Виктория Найдановагай хэлэһээр, монголнуудтай түрүүшын харилсаа һужаагайхид татаһан түүхэтэй.

-2018 оной хабар манай һургуулиин үхибүүд Улаан-Баатар хотодо англи хэлээр олимпиадада ошообди. Монгол Уласай Болбосоролой ехэ һургуулиин дэргэдэхи лицей иимэ хэмжээ ябуулга эмхидхэһэн байна. Маанадые тэдэ тон һайнаар угтажа абаа һэн, - гэжэ Виктория Аюшеевна хөөрэнэ.

Түрүүшынхиеэ Монгол ошоһон хадаа Һужаагай үхибүүд, багшанар олон найза нүхэдтэй болоо ааб даа. Удангүй тэдэнь дахинаа урилга эльгээһэн юм. Улаан-Баатар хотын 20-дохи һургуулида эрдэм шэнжэлгын хуралдаа үнгэргөө. Совет-монгол сэрэгшэдэй 80 жэлэй саада тээ туйлаһан түүхэтэ илалтын ойдо тэрэ хэмжээ ябуулга зорюулагдаа һэн.

-Һургуулиимнай гурбан һурагша тусхай элидхэлнүүдые англи хэлэн дээрэ бэлдээд ошоо. Хуралдаанай үедэ монгол, буряад, ород хэлэн дээрэ мэдээжэ сэрэгэй дуунууд сугларагшадта дурадхагдаа. Эгээл тиихэдэ тэрэ һургуулиин захирал Батбаяр манай Һужаагай һургуулитай хоёр жэлэй хугасаада харилсаа холбоотойгоор хүдэлхэ тухай хэлсээ баталха дурадхал оруулаа һэн, - гэжэ Виктория Аюшеевна хөөрөөгөө үргэлжэлүүлнэ.

Һонирхол татама элидхэлнүүд

Харюусалгата хэмжээ ябуулга ямар сэдэбээр үнгэргэхэб гэжэ Виктория Найданова һанажа ядаагүй. Буряад болон монгол уран зохёолшодто зорюулхабди гэжэ тэрэ аймагайнгаа бусад багшанарта абаһаар лэ мэдүүлээ. Ивалга аймагай эрдэм һуралсалай таһагтай хамта тус хэмжээ ябуулгаяа Гүрэльбэ һууринайнгаа шэнэ һургуулида үнгэргэхэ гэһэн шиидхэбэри абтаа.

-Һүүлэй үедэ буряад үхибүүдэй хэлэеэ мартажа байгаа сагта иимэ хэмжээ ябуулгануудые заал һаа үнгэргэхэ хэрэгтэй гээшэ. Юуб гэхэдэ, үхибүүд буряад зохёолнуудаараа һонирхожо эхилхэ бэзэ гээд найдагдана, - гэжэ Виктория Найданова найдан хэлэнэ.

Хэмжээ ябуулга хоёр наһанай бүлэгтэ үнгэргэгдөө гээд хэлэхэ шухала. 5-7-дохи классуудай үхибүүдэй дунда оройдоол зургаан элидхэл дурадхагдаа. Мүн 8-9-дэхи классуудай бүлгэмдэ 20 хүн хабаадаа. Ивалга аймагай бүхы һуралсалай гуламтануудай, Загарай аймагай болон Монголой үхибүүд һонирхолтой элидхэлнүүдые бэлдээ.

Монголой гурбан багша үхибүүдээрээ тус хэмжээндэ ерэжэ, булта Бямбын Ринчинэй намтарта, уран зохёолнуудтань зорюулһан элидхэлнүүдые монгол болон англи хэлэн дээрэ дурадхаа.

Ивалга аймагайшье үхибүүд хэдэн элидхэлнүүдые англи хэлэн дээрэ бэшэһэн байна. Жэшээлбэл, Доодо Ивалгын дунда һургуулиин Николай Ен-шин-фо Алексей Бадаев тухай хөөрэһэн байна. Гүрэльбын Янжима Молонова Гунга Чимитовэй зохёохы замда элидхэлээ зорюулаа.

-Нэн түрүүн мэдээжэ Гунга Гомбоевич Чимитовэй намтартай болон бүтээлнүүдтэйнь Интернет соо танилсааб. Һонирхожо, англи хэлэн дээрэ элидхэл бэлдэхэ гэжэ шиидээб. Тиихэ үедөө зохёолнуудтайнь дүтэ танилсажа, бүри ехээр һонирхожо эхилээб, - гэжэ Янжима Молонова хэлэнэ.

Буряад хэлэн дээрэ хэдэн һонирхол татама элидхэлнүүд бэлдэгдэһэн байна. Ехэнхи бүтээлнүүд ородоор хэгдэһэниинь гайхалгүй. Гэхэтэй хамта, ород үхибүүд эндэ хабаадажа, буряад уран зохёолшод тухай хөөрэжэ байхадань һайшаалтай байгаа.

Анха түрүүшынхиеэ боложо байһан хэмжээ ябуулга угтажа абаһан Гүрэльбын һургуулиин шабинар болон багшанар һайн бэлэдхэл хээ. Бүхы айлшадта тэдэ һонирхол татама концерт наада дурадхаа. Мүн тиихэдэ һаруул шэнэ һургуулитаяа танилсуулаа.

Багша болон һурагшадай һанамжаар иимэ һонирхолтой хэмжээ ябуулга ерэхэ жэлдэ дахинаа эмхидхэжэ, заншалта болгохо хэрэгтэй.

Авторай гэрэл зурагууд