​​Бато бэшэ - Тасболат

Пулемёт бариһан манай ганса сэрэгшэ Грузиин олон тоото хуягламал техникэтэй сэрэгшэдэй харгыда хүндэлэн зогсоо. Энэ эрэлхэг габьяае бодото дээрэнь хараһан, үзэһэн олон сэтгүүлшэд тэрэ сэрэгшые Бато Дашидоржиев гэжэ буряад хүбүүн гэжэ тараагаа бшуу.

- Зүб даа, сэтгүүлшэдые хараа һэм. Хэдэн жэлэй үнгэрһэн хойно “300 хэрэггүй, гансаараа илаха” гэжэ толилолго хараад, юундэ намайе Бато Дашидоржиев гэжэ нэрлээ юм, юрэдөө ойлгоогүйб. Тэрэ үедэ намтай нэгэшье буряад байгаагүй ха юм. Нэгэ хэды казахууд, дагестанаархин, армянууд болон ородууд лэ һэн, - гэжэ казах сэрэгшэ Тасболат Ибрашев Гүрэнэй Дүүмын гэшүүн Алдар Дамдиновта һаяхана хөөрэжэ үгэхэ зуураа, тиихэдэ тон юунэй болоһыень иигэжэ дурсаба:

- Тэрэ үдэр ротымнай командир Дьячковский Грузиин хилэдэ гаража, арад зондо туһалха, хамгаалха гэһэн даабари манда үгөө. Тиигээд бидэ тэрэ һүни хилэ һахяад, удаань Гори гэжэ газарта ерээбди. Хэды үдэрэй үнгэрхэдэ, полковник Штанденко ерээд, пулемётчигые туһалагшатайгаарнь болон мэргэн буудагшые намда үгэгты гэһэн эрилтэ табяа. Тиигэжэ дүрбэн хүбүүд тэрэ ехэ сэрэгтэй уулзаабди. Полковникнай урдаһаань ошожо, хоёр нүхэдни харгын даланай саагуур хоргодожо, буудахаяа бэлдэбэд. Харин харгы дээрэ би гансаарааб! Тэдэ сэрэгшэдэй дарганарай хэдышье ууртайгаар харгыһаа зайла, алахамнай гээшье һаань, урдань зогсооб. Ядахадаа, дайсад эрьелдээл даа.

Энээхэн үйлэ хэрэг иигээд лэ үнгэрхэ һэн бэзэ. Тиигэбэшье, тэрэ үедэ энэ сэрэгшын нугархагүй зоригтойе нюдөөрөө хаража, угаа ехээр гайхаһан хари гүрэнэй сэтгүүлшэд “300 хэрэггүй, гансаараа илаха” гэһэн статья толилһон юм.

amaranews.ru сайтһаа гэрэл зураг