​​Эрэмдэг бэетэй зоной үдэртэ дашарамдуулһан хэмжээ ябуулгада Буряад Уласай ажаһуугшад эдэбхитэй хабаадаа

Мухар-Шэбэрэй эрэмдэг зоной бүлгэмһөө ерэһэн Наталья басаган гоёолтонуудаар һонирходог. Тэрэнэй нүхэр басаган Вера зурагуудта анхаралаа хандуулангүйгөөр байжа шададаггүй. Бурханай дүрэнүүд, үнэхөөрөө, намайе абараа гэжэ тэрэ хөөрэнэ. Вера эгэшэнүүдээ, ахаяа ба хани нүхэрөө алдаа. Уйдхар гашуудалда дарагдахагүйн тула тэрэ зохёохы ажалда хам ороһон байна.

Эрэмдэг бэетэй зоной үдэртэ дашарамдуулһан уран гартанай харалган хоёр жэлэй нэгэ удаа эмхидхэгдэдэг. Тиимэһээ уласай мүрысөөнүүдэй илагшад бүхы Буряадһаа сугларжа, хэмжээ ябуулгада ажалнуудаа дэлгэнэ.

- Хэмжээ ябуулгада хабаадаха тухай 130-һаа дээшэ мэдүүлгэнүүд ороһон байна. Тэдэнэй 90-иинь – уран гартанһаа. Бэшэниинь хадаа дуулаха, хатарха, зүжэгтэшье наадаха бэлигтэй үхибүүд болоно. Тиихэдэ энэ харалган-мүрысөөн хадаа олон шэглэлтэй. Хабаадагшад циркыншье номернүүдые, фокусшье харуулдаг, - гэжэ уласай арадай уран бүтээлэй түбэй соёлой олониитын хэмжээ ябуулгануудай таһагые даагша Альбина Гомбоева тэмдэглэнэ.

Харалган-мүрысөөндэ сугларагшад тайзан дээрэ гарахаяа айнагүй. Үхибүүдшье, томошуулшье дуулаха, хатараха бэлигээ халуун альга ташалгаар угтуулан, бултанда харуулаа.

Гала-нааданай бүхы хабаадагшадта баярай бэшэгүүд ба бэлэгүүд барюулагдаа.