​​Түбшэн зантай, түгэс бэлигтэй

Цыден Аюржанаев

Хориин үргэн дайдын зүүн захада оршодог, булган талын хойморто түбхинэһэн манай Булам нютагта Норбын Аюр ба Ширабай Мэдэгма хоёрой бүлэдэ Агууехэ Эсэгэ ороноо хамгаалгын дайнай hүүлдэ, 1946 оной июниин 15-да, хоёрдохи үхибүүн - Цыден хүбүүн түрэhэн намтартай.

Цыден Норбоевич Аюржанаев найман наhандаа Буламайнгаа эхин hургуулида орожо, түрүүшын багша Намсалма Батуевна Батуевада эрдэм номдо hуража гараhан байна. 1958 онhоо 1965 он болотор Хориин 1-дэхи дунда hургуулида hуража дүүргээд, сэрэгэй албанда татагдажа, гурбан жэл соо амжалтатай hайнаар ябажа ерэһэн.

Нэгэ жэл Россиин Эрдэмэй академиин Сибириин таhагай Буряадай эрдэмэй түбтэ лаборантаар хүдэлөөд, Томск хотын Радиоэлектроникын дээдэ hургуулида орожо, 1976 ондо тэрэнээ дүүргээд, Улаан-Үдэ хотоёо бусаhан байна.

Цыден Норбоевичай ажалайнь арюун hайхан зам тухай бэшэхэ дуран хүрэнэ. 30 гаран жэлэй хугасаа соо Буряадай эрдэмэй түбтэ амжалтатай бэрхээр инженер-патентоведээр хүдэлhэн. “Ажалай ветеран”, “РАН-ай ветеран” гэhэн нэрэ зэргэдэ хүртэнхэй. Бүхы наhан соогоо ажалдаа шударгы ябаhанайнгаа түлөө олон тоото Хүндэлэлэй грамотануудаар, баярай бэшэгүүдээр, мүн “БАМ- ай барилгашан» гэhэн медаляар шагнагдаhан юм.

Цыден Норбоевич - түни түбшэн, түгэс бэлигтэй хүн юм. 2005 ондо «Буряад Республикын габьяата инженер» гэhэн үндэр нэрэ зэргэдэ хүртэhэн байна. Наhанайнгаа нүхэр Долгорма Жамсуевнатай хоёр алтан басагадаа гарыень ганзагада, хүлыень дүрөөдэ хүргэнхэй, дүрбэн аша зээнэртэй үнэр баян айлайхи. Хододоо түрэhэн нютагтаа туhалха гэжэ оролдодог юм. Мүнөө 73 наhандаа Цыден Норбоевич түрэл түтимэйнгөө ёhотой түшэг болонхой ябана.

Эсэгэ мүнхэ тэнгэриhээ

Эгээ хэзээдэш үргэмжэтэй,

Эхэ энхэ дэлхэйhээ

Эгээ хэдыдэш үндэhэтэй,

Алтан нарата үдэрэй

Аажам намжаагаар жаргажа,

Мүнгэн hарата hүниин

Мүнхэ hайханаар хужарлажа,

Газаагаа гасалан харангүй,

Зосоогоо зоболон үзэнгүй,

Заяандаа золтой hуугты,

Наhандаа согтой ябагты!

Цыден Аюржанаевай хубиин жасаһаа гэрэл зураг

Цыпилма БУДАЕВА