1108
Ёндон Бадарханович Бадмажапов мүнөө 70 наһанайнгаа жабхаланта ойе тэмдэглэжэ байна. Тэрэ Хориин аймагай Хори нютагта 1949 ондо түрэһэн. 1968 ондо Буряадай хүдөө ажахын дээдэ һургуулиин малай эмшэнэй факультедтэ ороhон байна. 1973 ондо д ээдэ мэргэжэлтэй боложо, Хориин совхозой гурбадахи таhагта эльгээгдэбэ.
Тэрэ үедэ институдта абаhан эрдэм мэдэсэеэ бодото хэрэг дээрэ бэхижүүлжэ эхилээ hэн. Тамир тэнхээ ехэтэй, ажал хэхэ дура һонирхолоо харуулhан, хэhэн хэрэгтээ шадамар залуу хүбүүе хүтэлбэрилэгшэнь обёорhон байна. Жэл хахад болоод, Ё.Б.Бадмажапов совхозой малай гол эмшэнээр томилогдожо, КПСС-эй гэшүүн болоhон юм.
Түрүүшын табан жэлэй хугасаа соо Ёндон Бадарханович совхозой мал ажахыда үндэр гэгшын дүнгүүдые туйлаа, нэрлэбэл: малай аюултай үбшэнгүүдые усадхаха, бруцеллёзтой тэмсэхэ талаар ехэхэн ажал хэгдээ. Тиихэдэ һэргылэмжын бүхы хэмжээ ябуулганууд эрдэмтэдэй заабари дурадхаалаар саг соогоо ябуулагдаhан байгаа.
1976 ба 1978 онуудаар СССР-эй хүдөө ажахын министерствын ба хүдөө ажахын хүдэлмэришэдэй профсоюзай ЦК-гай «Социалистическэ мүрысөөнэй илагша» гэhэн шагналда хүртэhэн байна. 1978 ондо «Хориин аймагай эгээл бэрхэ малай эмшэн» гэhэн нэрэ зэргэ Ёндон Бадмажаповичта олгогдоо.
1979 оной ноябрь һарада залуу хүбүүе совхозой парткомой нарин бэшэгшээр шэлэжэ абаhан байна. Дүрбэн жэл энэ тушаалда хүдэлжэ, партиин хүдэлмэришэнэй бодото зам дүүрэн гаража үнгэргөө.
1983 оной зунай хуушаар Ёндон Бадарханович түрэл ветстанцидаа бусажа, дуратай ажалаа хэжэ эхилээ. 80-яад онуудта Хориин аймагай ветеринарна албан хүгжэлтынгөө орьёлдо хүрэжэ, хүдөө ажахын үйлэдбэри түрүү зэргэдэ гараһандань Ёндон Бадархановичай бага бэшэ габьяа бии. Хори нютагтамнай ветлечебницын шэнэ комплексын барилга эхилэгдэжэ, 90-ээд оной эхеэр тушаагдаhан байна. Гүрэнэй мүнгэ салинай жаа болохо үедэ ветеринарна албан хуряамжалгануудта обтоhон байна. Гэбэшье 2005 онhоо эхилжэ, хүгжэлтынь шэнэ шата эхилээ. Малай эмшэд элдэб хэрэгсэлнүүдээр дуталдахаяа болёо, гадна ажалдань шухала хэрэгтэй мүнөөнэй тоног түхеэрэмжэнүүд абтаа. Эдэ бүгэдын саана Ёндон Бадархановичай шадал харагдана. Мүнөө дээрээ Хориин ветлечебницэ улас дотороо эгээл hайн гэжэ тоологдодог.
Ёндон Бадарханович наһан соогоо олон тоото шагналнуудаар урмашуулагдаһан, тиигэжэ 1999 ондо «Габьяата ветеринарна эмшэн» гэhэн нэрэ зэргэдэ хүртэһэн юм.
Ёндон Бадарханович Елизавета Цыденжаповна нүхэртэеэ гурбан басагад ба ганса хүбүүтэй – булта дээдэ мэргэжэлтэй болонхой. Ехэ басаганиинь Баирма Ёндоновна Буряад Уласай Арадай Хуралда зүбшэлэгшөөр хүдэлнэ. Дунда басаганиинь Лидия Ёндоновна - англи хэлэнэй багша, Хориин 2-дохи дунда hургуулиин захирал. Бага басаганиинь Дарима Ёндоновна - Улаан- Yдэ хотын Советскэ районой прокуророй туhалагша, I шатын юрист. Ёндон Бадархановичай урдаа хараха, нэрыень нэрлүүлжэ ябаhан хүбүүниинь Тимур Ёндонович эсэгынгээ замаар ябана. Мүнөө Хэжэнгын ба Хориин аймагуудта гүрэнэй ветеринарна гол инспекторээр амжалтатай хүдэлжэ байна.
Ёндон Бадарханович Хори нютагтаа амгалан тэнюун ажаhууна. Мүнөөшье болотор хүтэлбэрилхы тушаалда хүдэлһэн зандаа. Үнэн сэхэ, ажалдаа дуратай, сэсэн ба тэсэбэри ехэтэй, гайхамшагтай мэргэжэлтэн, бүхы хүсэл эрмэлзэлээ Хориин аймагай ветеринарна албанай хүгжэлтэдэ үгэhэн байна бшуу.
Гэр бүлын жасаһаа гэрэл зураг абтаба
Эржена ЖИГМИТОВА
