​Буряад уласта амарха арга үгтөө

Үнгэрэгшэ долоон хоногой гарагай 5-6 үдэрнүүдтэ “Москвада Алас Дурнын үдэрнүүд” үндэр хэмжээндэ үнгэрбэ. Тэрэнэй үедэ Алас Дурна зүгтэ хабаатай асуудалнуудта зүб харюу үгэжэ түрүүлһэн зондо шангууд барюулагдаа. Алас Дурна зүгэй тойрогой үзэсхэлэнтэ һайхан газарта хоёр хүнэй амарха 10 путёвко тэдэндэ үгтэнэ.

Түрүүшын шатада Алас Дурнын можо нютагуудта зорюулагдаһан Москвагай метрогой вагон дотор тодхогдоһон сахим хэрэгсэлээр асуудалда харюу үгэхэ хэрэгтэй байгаа. Хоёрдохи шатань хотын Экспоцентртэ баярай оршондо эмхидхэгдээ. Тэндэл 10 путёвкын 3-ыень шүүжэ гараһан зон элирээ. Тиигэжэ Сахалин арал руу Олеся Портнова, Амарай можо руу Анастасия Иванова ошохо болобо. Пензэһээ гарбалтай Артём Гостениндэ Буряадта амарха арга үгтэбэ.

- Урилдаанда шанга зон оролсоо, тиигэбэшье би шүүжэ шадааб. Буряад нютаг ошожо үзөөгүйб. Тиимэһээ намда ехэ һонирхолтой байна – заатагүй ерэхэб,- гэжэ Артем мэдүүлээ.

Гадна тус хэмжээ ябуулгын үедэ ерэһэн айлшад шагайгаар наадаха, морин хуураар хангюурдаха, тэнгэриин бэшэгтэй футболконуудые абаха аргатай байгаа. Энээн тухай Буряад Уласай аяншалгын сайд Мария Бадмацыренова дуулгаба.

Буряад Уласай Засагай газарай мэдээсэлэй албанай гэрэл зураг