​​Буряад уласта хасуури хэдытэб?

Заншалта ёһоороо Шэнэ жэлэй гол тэмдэг гоёолто – хүжэ ногоон хадхууртайхан хасуури декабриин 15-һаа наймаалагдана.

Шэлбэһэтэ модонуудые бэлдэхэ гурим хуушаараа үлөө. Тусхай үнэмшэлгэ абаһан хүн лэ модо унагааха эрхэтэй. Тиихэдээ даб гэһэн ой соо бэшэ, харин түймэрэй усал һэргылхэ гэжэ заагдаһан талмайда болон зайн галай утаһанай татагдаһан зуруудта отолхо ёһотой.

Нёдондо метр хахадтай хасуури гү, али нарһан - 350 түхэригтэ, 3 метр үндэртэй модон 500 түхэригтэ наймаалагдаа. Мүнөөшье жэлдэ иимэл сэнгээр худалдан абажа болохо.

Шэнэ жэлэй шэмэг модонуудые Баргажанай, Баунтын, Байгал шадарай, Бэшүүрэй, Зэдын, Яруунын, Загарайн, Кабанскын, Хурамхаанай, Муяын, Мухар-Шэбэрэй, Сэлэнгын, Хойто-Байгалай, Тарбагатайн, Хориин дэбисхэр дээрэ худалдан абаха арга бии.

Улаан-Үдэдэ Шэнэ жэлэй модохонуудые Үбэр Байгалай ой модо хамгаалалгын авиационно ажахы Шевченкын гудамжаар 130-дахи гэрэй дэргэдэ; Сенчихинэй гудамжаар “Титан” дэлгүүрэй урда болон Железнодорожно хорооной “Һолонго” сэсэрлигэй дэргэдэ наймаална.

Тусхай зүбшөөлгүйгөөр шэлбэһэтэ нэгэ модо тайрабал, 600-һаа 5 мянган түхэриг хүрэтэр гарза байгаалида хүргэһэн болоно. Декабрь-январь һарануудта Буряад Уласай тогтоолоор иимэ хуули буса ябадал хоёр дахин шангаар хэһээгдэхэ юм. Гарзыень түлүүлхэһээ гадна, 3 мянганһаа дээшэ яла оноогдохо.

Анна Огороднигой гэрэл зураг