1548
Үндэһэн маягаар гэр доторхиие шэмэглэдэг «D.master» студи байгуулһан Жаргалма Лхамадиева сониноймнай уншагшадые һонирхолтой ажалтаяа танилсуулһаар. Энэ удаа урагшаа һанаатай дизайнер гэр доторой шэмэглэлдэ хэрэглэгдэхэ, буряад маягаар бүтээгдэһэн паннотой танилсуулна.
- Панно гээшэ юун гээшэб? Хаана хэрэглэжэ боломоор бэ?
- Гэрнүүд, офиснуудые панногоор шэмэглэхэдэ, мүнөө үедэ тааруу, зохид. Панно хадаа гэрэй шэмэглэлэй нэгэ зүйл болоно, тэрэнээр гэрэй ханануудые, үһээ болон гэр газаашье талаһаа шэмэглэхээр.
- Теэд юрын зурагшье ханада зуража гоёохоор ха юм, илгаа бии гээшэ гү?
- Үйлэдбэреэрээл илгаатай. Бидэ панно бүтээхэдээ, тусхай обой дээрэ зурагуудые (принт) няадагбди. Тусхай обойнууднай ямар нэгэн материалда адли байха ёһотой. Жэшээнь, арһан.
- Танай паннонууд этно-маягаар бүтээгдэһэн. Хаанаһаа иимэ бодол түрөөб?
- Бага балшар байхадаа, үдэшэ унтахынгаа урда тээ ханада үлгөөтэй хибэс харажал хэбтэхэш. Угалзануудаарнь хургаараа удаахан саг соо ябуулхаш. Энэ саг намда ехэ дулааханаар һанагдадаг. Тиигээд буряад угалзануудые хэрэглэн, панно зохёобол, ехэ зохидоор харагдаха, мүнөө сагта ехэ тааруу байха гэжэ бодоод, ажал ябуулаабди. Панно хадаа аба эжынэрэймнай, үбгэ эсэгэнэрэймнай гэртэ ханадань үлгөөтэй байһан, мүнөө мартагдаһан шахуу хибэсүүдые һануулна гэхэдэ, алдуу болохогүй.
- Панно бүтээхэ ажал тухай хэлэжэ үгыт.
- Панно бүтээлгэдэ тон шухала ажалынь хадаа дизайн болоно. Эндэ угалзануудые удхаарнь тааруулха, үнгэ зүһыень зохилдуулха талаар графическа дизайнернууд ехэ нарин ажал ябуулдаг. Удаань бэлэн болоһон зураг үйлэдбэридэ эльгээгдэжэ, тусхай станогууд дээрэ барлагдадаг.
- Ямар янзын панно байдаг бэ?
- Паннонууд дүрбэн янзын илгаатай: панно-3d зураг, панно-зураг, панно-угалза, панно-фотообойнууд. Эдэнэр дундаа баһал илгаатай. Эдэ ажалнуудтай тодорхойгоор танилсаха гэбэл, dmaster03.ru сайтда орожо хараха аргатайт.
- Эдэ гоё бүтээлнүүдые хаана хэрэглэжэ болохоб?
- Гэр доторой шэмэглэлдэ хэрэглэмээр. Тиихэдэ панногой бүтээгдэһэн материал хорото бодосуудгүй, тэрэниие угаажа, аршажа болохо, шанар гэршэлһэн үнэмшэлгэтэй.
- Хүнүүд танай ажалаар һонирхоно гү?
- Манай паннонуудаар хүнүүд улам-улам һонирходог болонхой. Эдэ зурагууд манай уласай ажаһуугшадай гэрнүүдтэ хэгдэһэн ажалнууд дурадхагдана.
Зүйтэй зүбшэл
Гэрэй ханын бүхы ута, үргэндэнь няагдаһан панно ехэ зохидоор харагдадаг. Тиигэбэшье тэрэниие бага хэмжүүртэй зураг шэнгеэр, модоор жаазалаад (вставить в рамку) үлгэжэ болоно. Гэр дотороо панно хэрэглэхэдээ, таһалга дотор нэгэл зураг байбалнь зохисотой. Тэрэ шэмэглэл шухала үүргэ дүүргэхэ ёһотой. Нэгэ таһалгын хана үһээ хоёрто зурагуудые няажа боломоор, тиихэдээ удхыень тааруулха шухала.
Олон зоной ябадаг кафе, ресторануудта панно зурагуудые дуран соогоо хэрэглэмээр. Эндэ ямаршье зурагуудые тааруулхаар, тиихэдэ мүнгэншье багаар гаргашалагдаха.
ЭНЭ СЭДЭЭБЭЭР УНШАГТЫ:
Туһатай зүбшэлыень тодожо абая
Автор: Дарима АНАНДАЕВА
