811
Буряад Уласай Засагай газарай мэдээсэлэй албанай гэрэл зураг
ТОСуудые байгуулха, хүгжөөхэ талаар Буряадай дүй дүршэл халан абахаяа Эрхүү можын Эхирит-Булагад болон Баяндайн аймагуудай түлөөлэгшэд ерэһэн байна. Эхирит-Булагадай аймагай делегаци - мэр Геннадий Осодоев, Баяндайн аймагай делегаци мэрэй орлогшо Виталий Еликов хүтэлбэрилөө. Буряад Уласай Толгойлогшын болон Засагай газарай түрүүлэгшэ Баир Цыренов, айлшадые угтан абахадаа, энэ асуудалаар улас баян дүй дүршэлтэй гэжэ тэмдэглээ.
- Буряад уласта хоёр мянганһаа дээшэ ТОСууд ажалаа ябуулна, тэдэнэй тоо олошорһоор. ТОСуудай хүдэлөөнэй талаар гүрэн дотороо түрүүшүүлэй тоодо оронхойбди. Энэ ажалай ашаар, ажаһуугшадайнгаа ажабайдал һайжаруулнабди, тиихэдэ урагшаа һанаатай зонойнгоо эдэбхи үүсхэл дэмжэнэбди, - гэжэ Баир Цыренов хэлэбэ.
2019 ондо Буряад Уласай Толгойлогшо Алексей Цыденовэй даалгабаряар, улас дотор ТОСуудые дэмжэхэ талаар түб байгуулагданхай. Буряад Уласай Засагай газарай болон ТОСуудай 2010 онһоо хойшо суг ябуулдаг ажал тухай энэ түбэй түрүүлэгшэ Евгений Базаров хөөрэһэн байна.
Буряад Уласай Засагай газарай мэдээсэлэй албанай гэрэл зураг
ТОСуудай эдэбхитэдэй ашаар, юһэн жэлэй хугасаада хуули бусаар 2700-һаа дээшэ обоологдоһон бог шорой усадхагдаа, 772 сая түхэригэй 500-һаа дээшэ баг болон томо объектнүүд баригдаа. Тэрэ тоодо соёлой 11 байшан, түймэр саралгын зургаан депо, 40-һөө дээшэ тамирай танхим болон барилдаанай үргөөнүүд, хүүгэдэй наадаха 117 талмайнууд бодхоогдоо, һууринуудай хоорондо 400-һаа дээшэ модоной зайда харгынууд заһабарилагдаа. Уласай 67 хүдөө нютагуудта гудамжануудые гэрэлтүүлгын асуудалнууд шиидхэгдэээ. ТОСуудганса барилга болон заһабарилга хээд байдаг бэшэ, тэдэнэр, олоной хабаадалгатай соёлой, тамирай хэмжээ ябуулгануудые үнгэргэдэг.
2012 онһоо хойшо жэл бүри Буряад Уласай Засагай газар эрхим ТОС эрирүүлхэ мүрысөө соносхожо, тэрэнэй шан 15 сая түхэриг байһанаа, 2017 онһоо хойшо 60 сая түхэриг болоһон байна. ТОСуудай ажал тухай www.tosrb.ru сайтда харахаар.
Буряад Уласай Засагай газарта уулзалгын удаа Эрхүү можын түлөөлэгшэд Сэлэнгэ аймагай Харгана, Жаргаланта нютагуудай болон Гусиноозёрк хотын ТОСуудай ажалтайнь танилсахаяа гараһан байна. Удаань аймагай захиргаанда дүхэриг шэрээ үнгэргэгдэжэ, Эрхүү можын аймагуудтай ажал суг ябуулха тухай хэлсээн баталагдаа. Мүнөөдэр, январиин 23-да, Эрхүү можын түлөөлэгшэд Буряад Уласай Загарай аймагта ажалаа үргэлжэлүүлнэ.
