​​Буряад малай шэнэ үүлтэр

Буряад Уласай Засагай газарай үнгэргэһэн «Манай Буряад орон» гэһэн нээмэл суглаанда оруулагдаһан дурадхалнууд зүбшэн хэлсэгдэһээр. Буряадта анха түрүүшынхиеэ эмхидхэгдэһэн хэмжээ ябуулгын «Агропромышленна комплекс» гэһэн секцидэ бүхыдөө 90-ээд дурадхалнууд оруулагдаа. Тэдэнэй эгээл эрхимүүдынь бэелүүлэгдэхэ юм.

Тиигэжэ Буряад Уласай хүдөө ажахын академиин эрдэмтэд буряад малай шэнэ үүлтэр байгуулха түсэл дурадхаһан байна. Буряад үүлтэрэй үнеэдые казах малаан болон хальмаг үүлтэрэй бухануудта оруулжа, мяханай үүлтэрэй шэнэ мал бии болгохые тэдэ дурадхана. Эрдэмтэдэй һанамжаар, шэнэ үүлтэр Буряадай эгсэ хубилдаг уларилда ехэ тааруу - шэрхи байхаһаа гадна, мяханиинь тон һайн шанартай байхаар хараалагдана.

Түсэл бэелүүлхын тула мүнөө үедэ тон үсөөн болоһон, хосорхо туйлдаа хүрэжэ байһан буряад үүлтэрэй бодо мал элирүүлжэ баталха талаар эрдэм шэнжэлгын ажал ябуулха хэрэгтэй.

Эрдэмтэдэй һанамжаар, туршалгын, шэнжэлгын ажал 2034 он болотор хэгдэхэ. Тиихэдэ мяханай болон буряад үүлтэрэй үнеэдые мүнөө бэдэрхэ, элирүүлхэ шухала. Гэхэтэй хамта шэнэ үүлтэр яажа бии болгогдохоб гэһэн асуудалаар эмхидхэлэй ажал ябуулагдаха. Түрүүшын түл абажа, жэл бүри тэдэниие шэнжэлхэ, хинаха хэрэгтэй болоно.

Анна Огороднигой гэрэл зураг