Һаяхана Эрхүү хотодо үнгэрһэн бүгэдэ буряад угсаатанай “Алтаргана” нааданда түрэл хэлээрээ шүлэг зохёогшодой урилдаан олоной анхарал татаа. Монголой Хэнтэй аймагай Жамийнжав Баярмай илагшадай тоодо ороһон байна.
Жамийнжав Баярмай хадаа Хэнтэй аймагай Цэнхэрмандал сомондо ажаһуудаг юм. Шүлэгүүдые тэрэ 4-5 ангиин ябахадаа бэшэжэ эхилһэн.
- Үшөө бага наһанһаа хойшо уран зохёолдо дурлажа, илангаяа шүлэгүүдые һайшаажа, өөрын дураар бэшэжэ эхилээб. Мүнөө болотор 100 гаран бүтээлнүүдтэйб. Үшөө ном хэблүүлхэмни эртэшэг байна, - гэжэ Баярмай хөөрэнэ.
16-34 наһанай шүлэгшэдэй дунда шалгарһан Хэнтэй аймагай энэ зохёолшон бага наһан тухайгаа, буряад арад тушаа найруулгануудаа найр нааданда дурадхаа. Тэдэнь үндэрөөр сэгнэгдэжэ, түрүүшүүлэй тоодо оролсоо.
Жамийнжав Баярмай Ород гүрэн анха түрүүшынхиеэ ерэбэшье, буряад хэлэнэй эндэ яагаад хүгжэжэ байһан тухай яһала һонирхолтой һанамжануудые хэлэнэ.
- Ехэ “Алтарганын” нааданда олон буряад хүнүүдтэй харилсажа баярлааб. Ага, Могойто һууринуудай түлөөлэгшэд һайнаар буряад хэлэеэ мэдэнэ гэжэ ойлгооб. Мүн Буряад оронойшье ажаһуугшад түрэл хэлэеэ ойлгоно. Харин Эрхүү хотын, Усть-Ордын буряад угсаатан заншалаа алдажа байна гэжэ адаглабаб. Олонхинь буряад хэлээ мэдэнэгүй, ганса наһатайшуул бага зэргэ өөрын хэлэн дээрэ ярилдана, - гэжэ Баярмай һанамжаяа хэлэбэ.
Монголдо ажаһуудаг буряадууд баһал заншалаа, хэлэеэ алдажа байна гээд, залуу уран зохёолшо халаглана.
Манай Хэнтэй аймагта буряад номууд үсөөнөөр хэблэгдэнэ. Улаан-Баатарта номууднай баһал хоморой. Тиимэһээ эндэ наймаанда табигдаһан сэтгүүлнүүдые, номуудые олоор худалдан абааб. Мүн Улаан-Үдэһөө үшөө абахаб, - гэжэ Баярмай мэдүүлбэ.
Авторай гэрэл зураг