1096
Үнгэрэгшэ амаралтын үдэрнүүдтэ, январиин 21-22-то, Москва хотодо Дмитрий Медведевэй хүтэлбэри доро “Нэгэдэмэл ниитэ Росси” намай ээлжээтэ XVI ехэ хуралдаан (съезд) боложо үнгэрбэ.
Бэелүүлхэ түсэбүүдэй баглаа
Тэрэнэй хүдэлмэридэ манай уласай түлөөлэгшэд Буряад Уласай Толгойлогшо Вячеслав Наговицын, Буряад Уласай Арадай Хуралай Түрүүлэгшэ Цырен-Даша Доржиев, Арадай Хуралай Түрүүлэгшын орлогшо, “Нэгэдэмэл ниитэ Росси” намай нютаг можын таһагай хүтэлбэрилэгшэ Владимир Павлов түрүүтэй намай бүлэг гэшүүд хабаадалсаа. Хамта дээрээ энэ ехэ хуралдаанда 730-аад делегадууд, хоёр мянга гаран айлшад хабаадалсаһан байна гээд онсологдоо.
Буряад Уласай Толгойлогшо Вячеслав Наговицынай хөөрэһөөр, гүрэн түрымнай хүгжэлтэдэ сэхэ хабаатай амин шухала асуудалнууд эндэ зүбшэн хэлсэгдээ. Засаг барижа байгаа нам саашанхи хараа бодолнуудаа, түсэбүүдээ элирхэйлжэ, хүгжэлтын шэглэлнүүдые тодорхойлһон байха юм.
– Нэн түрүүн намай ажаябуулгаар хөөрэлдөөн болоо. Манай партиин дарга, Ородой Холбооной Засагай газарай Түрүүлэгшэ Дмитрий Медведевэй хэлэһээр, намай хүтэлбэрилхы зургаануудта нютагуудай түлөөлэгшэдые олошоруулха гэһэн шиидхэбэри абтаа. Анхандаа зуунай “Нэгэдэмэл ниитэ Росси” намай юрэнхы зүблэлдэ 20 хуби гэшүүдынь нютагуудай түлөөлэгшэд байһан һаа, мүнөө тэдэ зоной тоо 30 хубида хүргэгдэбэ. Баһа тиихэдэ улас, можо хизаарнуудай хуули зохёон гаргадаг зургаануудай һунгалтын урда тээ һунгамалнууд болохо дуратайшуулые намайнгаа зүгһөө дэбжүүлхын тула уридшалан дуу үгэхэ праймеризуудые заатагүй үнгэргэхэ тухай шиидхэбэри абтаа, - гэжэ Вячеслав Владимирович тэмдэглээ.
Хүгжэлтын шэглэлнүүд хүсэ ехэтэй
Мүн тиихэдэ ехэ хуралдаанда хабаадагшад долоон томо бүлгэмүүд боложо хубаараад, ажабайдалай элдэб һалбаринуудай олон тоото асуудалнуудаар зүбшэн хэлсээ. Тэдэнь булта засаг баригша намай өөрынгөө бэелүүлхэ тусхай түсэбүүдтэ оруулһан шэглэлнүүд болоно. Тодорхойлходо, “Улас түрын дээдын шанар шэнжэ”, “Хүгжэлтын болон тогтууритай ажабайдалай эдэй засаг”, “Ниигэмэй һалбариин бодол”, “Ухаатай хүсэн болон соёлтой түрүү ябадал”, “Элүүр энхэ ерээдүй”, “Өөрынгөө гэртэ эзэн байха”, “Хүгжэнги хүдөөтэй улас түрэ” гэжэ нэрлэгдэһэн бүлгэмүүдтэ үрэ ехэтэй хөөрэлдөөнүүд үнгэрөө.
Уласай Толгойлогшын хэлэһээр, шэглэл бүхэндэ горитой ехэ анхарал хандуулагдажа, гүрэнэй бюджедһээ мүнгэн һомологдохо. Илангаяа ниигэмэй һалбаринуудта – эрдэм һуралсал, элүүрые хамгаалга, соёл урлалда шэнэ байшануудые бариха, байһан объектнүүдые заһабарилха хэрэгтэ гүрэнэй мүнгэн туһаламжа гаргашалагдаха. Мүн тиихэдэ, эдэй засаг, хүдөө ажахы, гэр байрын-коммунальна болон хүдөөгэй ажахынууд, оршон тойронхи байгаали хамгалга болон бусад һалбаринуудта анхарал баһал хандуулагдаха юм.
Арадай Хуралай Түрүүлэгшын орлогшо, “Нэгэдэмэл ниитэ Росси” намай нютаг можын таһагай хүтэлбэрилэгшэ Владимир Павловай хэлэһээр, манай уласай түлөөлэгшэд бүхы бүлгэмүүдэй хүдэлмэридэ эдэбхитэйгээр хабаадажа, зүбшэн хэлсэлгэнүүдһээ бүри ехэ мэдээсэл абаад, дүй дүршэлтэй боложо ерээ.
– Гол шухала асуудалнуудай нэгэн – хүдөө нютагуудые, тэндэхи ажахын һалбариие дэмжэхэ, хүнгэлэлтэтэй урьһаламжануудые үгэхэ асуудалда анхарал хандуулагдаа. Эдэй засагые, хүдөө ажахые засагнай бүримүһэн дэмжэхэ түсэбтэй – гэжэ Владимир Анатольевич һалбариин бүлгэмэй зүбшэн хэлсэлгын удаа һанамжаяа хубаалдаа.
Урагшаал дабшаха зорилго
Гүрэн түрымнай Юрэнхылэгшэ Владимир Путинай байгуулһан “Нэгэдэмэл ниитэ Росси” нам орон дотороо засаг барижа, хүгжэлтын замаар урагшаа дабшаха зорилго табиһаар үнинэй. Энэ зорилго бэелүүлхэ талаар бүтээгдэжэ байһан ажалай дүнгүүд эли тодо харагдана. Дэлхэй дээрэ ямарханшье байдалай тогтоходо, алиншье гүрэнэй хэдышье манда эсэргүүсээ һаа, Эхэ оромнай үбдэг дээрээ унаад орхихогүй.
Гэрэл зураг дээрэ: З.Цыбикмитов, Т.Сыланова, А.Голков, А.Варфоломеев, В.Наговицын, Ц-Д.Доржиев, А.Гармаева, В.Ведерников
Автор: Василий ЦЫБИКОВ
