1060
Буряад Уласай Толгойлогшын уялга дүүргэгшэ ерээдүйн түсэбүүд болон өөрынгөө гэр бүлэ тухай хөөрэжэ үгэбэ.
Алексей Цыденов Буряад Уласай хүгжэлтэдэехэ ажал ябуулагдаа гэжэ тэмдэглэбэ.
-Буряад Уласай хүгжэлтэдэ ямар ажал хэгдээб гэжэ хараха, үзэхэ шухала. Эндэ хэгдэһэн ажал ехэ байна. Түрүүн һайса шудалжа үзөөд,шиидхэбэринүүд абтажа эхилхэ. Буряад Уласай Засагай газарай гэшүүдтэй хамта уласай хүгжэлтэдэ абтаһан программануудые, холын хараагай түсэбүүдые шудалха болоноб. Буряад уласай аймагуудаар ябажа, байра дээрэньшиидхэхэ асуудалнуудые элирүүлхэ шухала. Буряадай Уласай Засагай газарай гэшүүдтэй, Арадай Хуралай һунгамалнуудтай ажаллахабди. Уридшалжа ажал тухай хэлэхэнь эртэ байна, - гэжэ Алексей Цыденов мэдүүлбэ.
Буряад УласайТолгойлогшын тушаалда томилогдоһон тухай асуудалда иигэжэ харюусаба:
-Үндэр тушаал эзэлхэб гэжэ һанаандам ороогүй байгаа. 2010 онһоо хойшо Ородой Холбооной Уласай Юрэнхылэгшын дэргэдэхи залуу хүтэлбэрилэгшэдые бэлдэхэ нөөсэ албанда байгааб. Эрдэм мэдэсэеэ дээшэлүүлхэ курснууд, тестировани, харишье гүрэндэ дүй дүршэлөө дээшэлүүлээбди. Тестнүүдые гаража, һуралсалаа үргэлжэлүүлжэ ябааб.
Гэр бүлэ тухайгаа иигэжэ хөөрэнэ:
-Һамгатайб, дүрбэн үхибүүтэйб, багамнай үен хүрөөгүй. Абамни – буряад, эхэмни - ород яһанай юм. Түмэр харгын һалбарида хүдэлдэг зоной дүрбэдэхи үеын хүмби. Минии элинсэг 1904 ондо Харбинда түмэр харгын хүдэлмэришэн байһан. Абамни Петровско заводто ажаллажа эхилһэн, удаань Могзондо, һүлээрнь Шэтэ хотодо байгаа. Эхэ эсэгэмни эрдэм һургуули олгоо, ажабайдалда зүб хараа бодолтой ябахымни тулада ехэ оролдоһон. Тэдэнэй аша габьяагаар би ябанаб.
Буряад Уласай Толгойлогшын үүргэ дүүргэгшэ Алексей Цыденов буряад хэлэ муу мэдэхэб гэжэ хэлэнэ һэн. Тиигэбэшье һаяын сагта шудалхаб гэжэ үгэеэ үгэбэ.
-Буряад хэлэ муугаар мэдэхэб. Хүгшэн эжытэеэ байхадаа буряадаар хөөрэлдэдэг һэмби. Хани нүхэрни түрэл хэлэеэ мартаһаншни эшхэбтэр гэхэ юм. Хэлэеэ шудалхаб.
Мүнөөдэр Буряад Уласай Толгойлогшын уялгасаг зуура дүүргэгшэ Алексей Цыденовтэй албан ёһоной уулзалга үнгэрөө гэжэ һануулнабди.
Энэ уулзалгые «Буряад үнэн» хэблэлэй байшан онлайн –дамжуулга хэһэн байна. Һонирхожо уншаха гэбэл эндэ хаража болоно.
