​Хуралай дарга Захааминаар ябажа ерээ

Үнгэрһэн долооной эсэстэ Буряад Уласай Арадай Хуралай Түрүүлэгшэ Цырен-Даша Доржиев ажалай хэрэгээр Заха­амин аймагаар ябаха үедөө Санага нютаг морилжо, һээр шаалгаар хизаар можонууд хоорондын мүрысөө эмхидхэг­шэдые, энэ хэмжээ ябуулгада хабаадагшадые урмашуулһан байха юм.

Һээр шаагшадые амаршалаа

Мүн тиихэдэ уласай парламен­тын дарга эрдэмэй-практическа бага хурал дээрэ үгэ хэлэһэн бай­на. Энэл суглаанда хабаадагшад Хуралай түрүүлэгшые заншал­та наадануудай Буряад Уласай ниитын эблэл болохо федера­циин даргаар һунгажа абабад гээд олондо мэдээсэл тараадаг хэрэгсэлнүүдтэй ажаллаха тала­ар Арадай Хуралай таһаг мэдээ­сэбэ.

Һээр шалгаар мүрысөөнэй үедэ үгэ хэлэжэ, Цырен-Даша До­ржиев энэ хэмжээ ябуулга анхан эмхидхэгшэдтэ – Денис Доноев, Баяр Жамьянов, Юрий Дамба­ев гурбанда баяр хүргэжэ, гарай бэлэгүүдые барюулаа. Буряад зоной заншалта наадануудые һэргээхэ, саашань дэлгэрүүлхэ хэрэгтэ тэдэнэй оруулжа байһан хубита ехэ гээд уласай парламен­тын дарга онсолон тэмдэглээ.

Дүн хамта энэ мүрысөөндэ 260 хүн хабаадалсаа. 550 мянган түхэригтэ хүрэхэ шангуудай жа­сатай байба. Аха, Түнхэн, Ярууна, Хэжэнгэ, Ивалга аймагууд өөһэдынгөө түлөөлэгшэдые эль­гээгээ. Мүн баһа тиихэдэ Захаа­мин аймагай сомон бүхэн өөрын командатай байгаа.

Мүнгэ һомологшодто баяраа мэдүүлбэд

Ажалай хэрэгээр Захаамин ай­магаар ябахадаа, Арадай Хуралай Түрүүлэгшэ Цырен-Даша Доржи­ев Хуртага нютаг хүрэжэ, Зөөхэй гэжэ буусада түхеэрэгдэһэн мал­шадай байра хараа. Энэ ферме­рэй үмсын ажахы хүгжөөхын тула ямар туһаламжа хэрэгтэй гээшэб гээд уласай парламен­тын дарга һонирхоо. Буусын эзэн зуһаланай гэр барихада туһа хэрэгтэй байна гэжэ мэдүүлээ. Тиихэдэнь Арадай Хуралай Түрүүлэгшэ “Россельхозбанкһаа” хүнгэлэлтэтэй урьһаламжа аба­ха хэрэгтэ туһалха аргатайб гэжэ хэлээ.

Цырен-Даша Доржиев Ёнгор­бой нютаг мүн лэ ошоо. 2017 ондо эндэ шэнэ һургуули баригдаха­ар түсэблэгдэнэ. Нютагай зон Арадай Хуралай Түрүүлэгшэдэ, мүн бусад һунгамалнуудта уласай бюджедтэ энэ мүнгэ һомолһонойнь түлөө баяр баясхаланиие хүргэһэн байха юм. Һургуулиһаа ондоо тиимэ ехэ удха шанартай юумэн хүдөө ню­тагуудта үгы шахуу гээд ёнгор­бойнхид тэмдэглээ.