818
Буряад Уласай Засагай газарай эдэй засаг хүгжөөхэ талаар Юрэнхы сайдай орлогшо Александр Чепик өөрынгөө дураар тушаалһаа болихо тухайгаа мэдүүлгэ бариба.
Энээн тухай Буряад Уласай Толгойлогшын уялга саг зуура дүүргэгшэ Алексей Цыденов түсэблэлгын суглаан дээрэ дуулгаба. Буряад Уласай хүгжэлтэдэ өөрынгөө хубита оруулһанай түлөө Александр Чепик «За заслуги передРеспубликой Бурятия» гэһэн медаляар шагнагдаба гэжэ «Буряад үнэн» хэблэлэй байшан мэдээсэнэ.
Facebook гэһэн сүлжээнэй хуудаһанда Александр Чепик Буряад Уласай Засагай газарай орлогшын тушаалда 2007 онһоо байхадаа, хэгдэһэн ажалайнгаа зарим тэды дүнгүүдые согсолбо. Һүүлэй арбан жэлэй хугасаада Буряад улас дотор эдэй засагай талаар хүдэлмэри бюджедэй олзо оршо дээшэлүүлгэдэ, үйлэдбэри шэнэлэлгэдэ шэглүүлэгдээ, хари гүрэнһөө ородог эд хэрэгсэлнүүдые бага болгохо талаар хэмжээ ябуулганууд бэелүүлэгдээ, олзын бага хэрэг эрхилэгшэдые дэмжэхэ, хүн зониие ажалаар хангаха талаар ажал ябуулагдаа.
Экономикын хүгжэлтэдэ хүн зониие ажалаар хангаха талаар бэелүүлэгдэһэн гүрэнэй программанууд аргагүй ехэ нүлөө үзүүлээ. Ажалгүй зоной тоо бага болоо.
Буряад Уласта аяншалагшадай олоор ябахын тула үнгэргэгдэһэн хэмжээ ябуулгануудбаһал үрэ дүнтэй байгаа. 2007 онтой жэшэхэдэ, 2016 ондо аяншалагшадай тоо 4,6 дахин олон болоо.
2008 – 2016 онуудта ашагта малтамалнуудые олзоборилгын түсэлнүүд бэелүүлэгдээ. Барилгын хэрэгсэлнүүдые үйлэдбэрилхэ заводууд баригдаа.
-Буряад Уластай холбоо харилсаагаа үргэлжэлүүлхэб. Facebook сүлжээндэ өөрынгөө ажаябуулга тухай бэшэжэ байхаб,- гэжэ Александр Чепик мэдүүлбэ.
