701
Алексей Цыденов мүнөөдэрэй түсэблэлгын суглаан дээрэ Толгойлогшын нэгэдэхи туһалагша, зүблэгшэдэй бүлэгэй хүтэлбэрилэгшөөр Валерий Галицкий гэгшые томилбо гэжэ Буряад Үнэнэй мэдээсэлэй албан дуулгана. Энээнһээ урид энэ тушаалда Марк Калашников байһан юм. Тэрэ өөрынгөө дураар мэдүүлгэ бэшэжэ, тушаалһаа бууба. Марк Калашников Буряад Уласай түрүүшын Юрэнхылэгшэ байһан Леонид Потаповтай ажаллажа эхилһэн юм.
Валерий Галицкий Москвагай гүрэнэй зам харилсаанай дээдэ һургуулида “Организация перевозок и управление на транспорте (железнодорожный транспорт)» гэһэн мэргэжэлээр һуража, 2008 ондо дүүргэһэн юм. Тэрэ Алексей Цыденовэй Ородой Холбоото Уласай Транспортын сайдай орлогшын тушаалда байхада, сугтаа хүдэлһэн байна.
Буряад Уласай булюу талануудые олондо мэдүүлхэ, һурталшалха талаар зүблэгшын тушаалда (советником по брендированию и продвижению имиджа республики) Аркадий Зарубин томилогдобо. Буряад Уласай Засагай газарта иимэ тушаал анхан байгаагүй.
Анна Огороднигой гэрэл зураг.
