​Ородой Холбоото Уласай Транспортын сайд Максим Соколов Буряад Улас ерэбэ

Мүнөөдэр Ородой Холбоото Уласай Транспортын сайд Максим Соколов албанай хэрэгээр Улаан-Үдэ ерэбэ. Буряад Уласай Толгойлогшын уялга дүүргэгшэ Алексей Цыденов “Байкал” аэропортдо хүндэтэ айлшаниие угтаба. Тэндэ Буряад Уласай аэродромой комплексые һэльбэн шэнэдхэхэ талаар хүдэлмэри ямараар ябуулагданаб гэжэ Максим Соколов хараба. Хангалгын байгууламжын хүгжэхэдэ, Буряад Уласта ямаршье самолёдууд бууха аргатай болохо гэжэ сайд тэмдэглэбэ. Транспортын хангалгын байгууламжын хүгжэлтэһөө бүхы һалбаринууд дулдыдана гэжэ Буряад Уласай Толгойлогшын уялга дүүргэгшэ Алексей Цыденов Транспортын сайд Максим Соколовтой үнгэргэгдэжэ байһан зүблөөндэ хэлэбэ. Энээн тухай Буряад Үнэнэй мэдээсэлэй албанай сурбалжалагша зүблөөнһөө дуулгана.

- 2017 ондо аэропортдо транспортын хангалгын байгууламжын ехэ барилга хэгдэхээр хараалагдана. Ородой Холбоото Уласай Юрэнхылэгшэ В. Путинай шиидхэбэреэр “Аюулгүй, һайн шанартай харгынууд” гэһэн федеральна түсэл Буряад Уласта бэелүүлэгдэжэ эхилбэ, - гэжэ Максим Соколов хэлэбэ.

2016 оной сентябрь һараһаа Улаан-Үдын аэропортдо ниидэлгын зурууд баригдажа эхилээ. 2018 ондо тэрэ ашаглалгада тушаагдаха юм. Федеральна бюджедһээ һэльбэн шэнэдхэлгэдэ 4 млрд. түхэриг һомологдохо юм.

Ородой Холбоото Уласай Транспортын сайдай хэлэһээр, 27 хотонуудта “Аюулгүй, һайн шанартай харгынууд” гэһэн федеральна түсэл бэелүүлэгдэхэ гэжэ хараалагдаһан байгаа. Харин 2017 ондо Улаан-Үдэ, Калининград хотонууд эндэ нэмээгдэһэн байгаа. Тиихэдээ Улаан-Үдэ хотын харгы заһабарилгада 11 млрд. түхэриг гаргашалагдаха байна.

- “Аюулгүй, һайн шанартай харгынууд” гэһэн федеральна түсэл олондо һайшаагдаа. Улаан-Үдэдэ иимэ ехэ харгын барилга анхан хэгдээгүй. Гансашье 2018 оной түсэлдэ бэшэ, харин 2025 он болотор бэелүүлэгдэхэ түсэлдэ оруулһандань баяртайбди,- гэжэ Алексей Цыденов хэлэбэ.

Үдэрэй туршада Максим Соколов “Управление трамвая” гэһэн нютагай нэгэдэмэл үйлэдбэридэ хүрэхэ юм.

Һүүлээрнь, Максим Соколов, Алексей Цыденов гэгшэд Баргажан аймаг гаража, Улан-Үдэ – Турунтаево – Хурамхаан – Новый Уоян гэһэн харгы һэльбэн шэнэдхэлгын хүдэлмэри хараха түсэбтэй.