​Аюулгүйе сахиха асари ехэ үүргэ

Буряад Уласай Толгойлогшын уялга дүүргэгшэ Алексей Цыденов Пётр Мордовскойе уласай Засагай газарай Түрүүлэгшын аюулгүйн асуудалнуудай талаар орлогшын, Засагай газарай гэшүүнэй уял­га дүүргэгшээр томилбо. Шэнэ тушаалда һууһан даргатай уулза­жа хөөрэлдэһэн байнабди.

- Пётр Степанович, шэнэ үндэр, тон харюусалгатай тушаалда томилогдоһон ушараартнай амар­шалаад, хэдэн асуудал табиха һанаатайбди. Түбхын түрүүндэ ямар асуудалнуудые та шиидхэ­хэ һанаатайбта? Аюулгүйе сахиха бүхы асуудалнуудые шиидхэдэг болобо гэжэ хэлэгдээд байна ха юм. Ямар шэглэлнүүд гээшэб энэм­най? Шэнэ тушаалда хүдэлхэдөө ямар зорилгонуудые урдаа табяад байна гээшэбта?

- Хуушан тушаалдаа хэжэ байһан ажалаа үргэлжэлүүлхэб. Тэрэнэйн­гээ хажуугаар хэдэн шэглэлээр асуу­далнууд нэмэгдээ гэжэ хэлэхэ хэрэг­тэй. Хуули сахилгын, сэрэгэй талаар хүтэлбэрилхы зургаануудтай, 36-дахи армитай харилсаха асуудалнууд байна. Тус армиин сэрэгэй зүблэлэй гэшүүнээр һүүлэй гурбан жэлэй тур­шада уласайнгаа гүйсэдхэхы засагые түлөөлжэ байдагби.

Засагай газарай дэргэдэхи тусхай комисси хүтэлбэрилжэ, хуули хаза­гайруулха ушарнуудтай тэмсэхэ ажа­лаа анхандаашье хэдэг һэмби. Бусад нютаг можонуудта иимэ комисси­нуудые амбан захирагшадай (гу­бернаторнуудай) орлогшонор толгойлдог юм, гансал манай Буряад Уласта Толгойлогшын захиргаанай хүтэлбэрилэгшын орлогшо байһан би тус комиссиин дарга байһан хүм. Тиимэ ушарһаа гүрэнэй зургаануудай талаһаа зууршалгашье байһан юм.

Гэхэтэй хамта хүн зоной аюулгүй байдал сахиха талаар, ойн түймэрнүүдые һэргылхэ, сараха та­лаар горитой ехэ ажал харюусалга нам дээрэ бууба гээшэ. Буряадай Толгойлогшын уялга дүүргэгшэ Алексей Самбуевич Цыденов шэнэ тушаалда орожо, эдэ асуудалнуудые шиидхэхэ даабари намда үгөө юм. Засагай газарай Түрүүлэгшын нэгэ­дэхи орлогшо онсо байдалай талаар комисси хүтэлбэрилхэ дүримтэй юм. Харин би мүнөө тус комиссиин дар­гын орлогшо болохо зэргэтэйб.

Ородой Холбоото Уласай Онсо байдалай талаар яаманай Буря­ад Уластахи хүтэлбэритэй эрид шуудшье асуудалнуудаар, үдэр бүрииншье ажалаар тогтууритай ха­рилсаа холбоо тогтоон ажаллаха, эр­хэтэнэй оборонын болон онсо бай­далай талаар уласай түлөөлэлгэтэ эмхиин хүдэлмэриие залан хүтэлхэ шэнэ зорилгонууд табигданхай.

- Онсо байдалай талаар бүхы асуудалнуудые та шиидхэдэг, хар­галзалдаг болобо гээшэ гүт?

- Тиимэ. Байгаалиин болон хүнэйшье зэмээр бии болодог, тех­ногеннэшье түрэлэй онсо байдал­нуудые һэргылхэ, тэдэниие сараха, хойшолонгуудыень усадхаха талаар асуудалнуудые дары шиидхэхын хажуугаар, засагай бүхы зургаану­удай, тэрэ тоодо нютагай өөһэдын хүтэлбэринүүдэй хоорондохи ха­рилсаануудые зүб мүрөөр тогтоожо, ажал ябуулха зорилготой болобоб.

- Үшөө ямар ажал энэ туушал­датнай хамаатай болоно гээшэб?

- Эдилгэ абалгатай тэмсэхэ асуу­дал. Энэ хуули буса ябадалнуудһаа һэргылхэ, тэдэнтэй тэмсэхэ талаар тусхай таһаг байгуулагдаһан юм. Энэ ажал хэхэ, мүн тиихэдэ албан тушаалтадай гаргашануудые шалга­ха эрхэ уласай Толгойлогшын уялга дүүргэгшэ намда сэхэ дамжуулаа.

Харгын аюулгүйн асуудалнуудаар би баһал һонирхожо байхаб. Уласай хүтэлбэрилэгшын толгойлдог тус­хай комиссиин түрүүлэгшын орлог­шо болохомни.

Мүн тиихэдэ аймаг нютагуудай засагай байгууламжануудта эдэ бүгэдэ асуудалнуудаар туһалдаг байхаб. Мүн тиихэдэ сэрэгэй албан­да зониие татаха, гүрэн түрын нюуса хадагалан сахиха, аршалан хамгаалха ажалые харгалзалхаб. Тэрээнһээ га­дуур, хилын харуулай, тамуужанай албануудтай, шүүхэ газарнуудай шиидхэбэринүүдые бэелүүлхэ та­лаар хүдэлмэриие хаража байха, ма­най уласта ажалаа эрхилжэ байгаа хүтэлбэрилхы, зонхилхы зургаану­удтайнь суг хамта ажалаа эрхилхэ зорилгонуудтайб.

Уласай Толгойлогшын, Засагай газарай дэргэдэ байгуулагдаһан саг үргэлжэ хүдэлдэг зүбшэлгын зургаануудые даргамнай өөрөө хүтэлбэрилдэг гээшэ. Эдэнь хи­лын харуулай асуудалнуудаар, алан һүрдөөлгэтэй, хорото бодосуудтай, эдилгэ абалгатай тэмсэхэ талаар, сэрэгэй албанда татагдаха зониие бүридхэлдэ абаха асуудалнуудай талаар комиссинууд, Засагай газа­рай уйтадхагдамал зүблөөн болоно. Эдэ бүгэдэнэй түрүүлэгшынь ор­логшо боложо, үдэр бүриин ажалые таһалгаряагүйгөөр хэжэ байха – ми­нии гол зорилгонуудай нэгэн боло­нол даа.

- Асуудалнуудтамнай тодо ха­рюунуудые үгэһэндэтнай баяр хүргөөд, шэнэ, харюусалга ехэтэй ажалдаа амжалтатай хүдэлэгты гэжэ үреэнэбди.