627
Аяншалгын федеральна агентство Байгалай эрьедэ амархаа ерэһэн аяншалагшадһаа мүнгэ суглуулха тухай дурадхал зүбшэбэ. Аяншалгын агентствын хүтэлбэрилэгшын орлогшо Николай Королёвой хэлэһээр энэ асуудал һайса бодожо үзэхэ шухала. Суглуулһан мүнгэ Уласай бюджедтэ оруулха гэбэл, гарай мүнгөөр тоосолго хэхэгүй , харин аяншалгын газарнуудые арилгаха, болбосон түхэлтэй болгохо ажал ябуулгада СМС-бэшэлгээр мүнгэ суглуулжа болохо гэжэ Буряад Уласай Толгойлогшын уялга дүүргэгшэ Алексей Цыденов тэмдэглэбэ.
Ородой Холбоото Уласай Транспортын сайд Максим Соколовтой, Аяншалгын федеральна агентство хүтэлбэрилэгшын орлогшо Николай Королёвтой үнгэрһэн зүблөөн дээрэ аяншалагшадһаа мүнгэ суглуулха асуудалаар Аяншалгын федеральна агентство ямараар ханданаб гэжэ Алексей Цыденов асууба. Юуб гэхэдэ, Буряад Улас, Байгалай эрьедэ амархаа хүн зон олоороо ерэдэг, тэдэнэр эмхитэй, гуримтай аяншалагшад бэшэ, өөрынгөө дураараа ябаһан хүнүүд. Тиимэһээ эдэ зонһоо уласай бюджедтэ ямаршье мүнгэн ородоггүй шахуу.
Красноярск хотодо үнгэргэгдэһэн эдэй засагай форумдо Буряад Уласай Толгойлогшын уялга дүүргэгшэ Алексей Цыденов аяншалагшадһаа мүнгэ суглуулха гэһэн дурадхал оруулһан байна. Тиихэдээ энээниие диилэшэгүй татабари болгохогүй гэжэ тэрэ тэмдэглэбэ. Алексей Цыденовэй һанамжаар, нэн түрүүн энэ хэмжээ ябуулга аяншалагшадай аюулгүй, һайн шанартайгаар амархада туһатай байха. Аяншалагшад түлэһэн мүнгэнэйнгээ аша үрые хараха ёһотой гэжэ тэрэ хэлэбэ.
- Энэ хэмжээ ябуулга Байгалай байгаалиин дайда хизаарта бэелүүлхэдэ, тааруу байха. Үндэһэтэнэй дархан газарнууд өөдынгөө дайдада хүнүүдые оруулхадаа, тэдэндэ туһа хүргэхэдөө мүнгэ суглуулна ха юм. Хайшан гэжэ, ямар аргаар мүнгэн суглуулагдахаб гэжэ һайса бодожо үзэхэ хэрэгтэй,- гэжэ Николай Королёв хэлэбэ.
СМС –бэшэгэй аргаар мүнгэн суглуулжа болоно гэжэ Алексей Цыденов жэшээ табиба.
- Мүнгөө түлэһэн тухай томьёо тэмдэг (код) абажа болохо. Гараар суглуулһан мүнгэн нэгэ “бэрхын” хармаанда орошохо юм. Иимэ байдал маанадта огто тааранагүй, - гэжэ тэрэ хэлэбэ.
“Байкал: великое озеро великой страны” гэһэн программада мүнгэ суглуулха асуудалаар бүлэг хараалагданхай гэжэ Николай Королёв тэмдэглэбэ.
- Энэ ажалаа зүбөөр эрхилбэл, бог шорой арилгаха талаар олон асуудалнууд шиидхэгдэхэ юм,- гэжэ Аяншалгын федеральна агентствын хүтэлбэрилэгшын орлогшо хэлэбэ.
Нэн түрүүн хүнүүдэй эмхитэйгээр амарха талаар ажал ябуулха шухала. Буряад уласта энэ асуудал шиидхэгдэжэ байна гэжэ Аяншалагшадай агентствын хүтэлбэрилэгшын орлогшо Николай Королев хэлэбэ.
