653
Ородой Холбоото Уласай Транспортын сайд Максим Соколов болон Буряад Уласай Толгойлогшын уялга дүүргэгшэ Алексей Цыденов гэгшэд Буряад Уласай эгээл шухала харгынуудай нэгэн Улаан-Үдэ – Турунтаево – Хурамхаан – Новый Уоян зүгэй харгы тухай хэлсэбэ. Тэдэнэр Баргажайн аймагай Максимиха һуурин шадар баригдажа байһан харгы шалгаба. Энэ харгын барилга федеральна программада оруулагдажа, 2003 ондо барилга эхилһэн байна. Тэрэнэй ехэнхи хубинь, 221 модоной харгы ашаглалгада тушаагданхай. Мүнөө хүдэлмэришэд 215-һаа 230 модоной зайда харгын барилга дүүргэжэ байна.
Максим Соколов, Алексей Цыденов харгын заһабарилга шалгажа, байра дээрээ сашанхи түсэбүүд тухай хэлсэбэ.
- Декабриин 25-да баталагдаһан хэлсээн дүүрэхэ, бидэ ажалаа эршэтэйгээр ябуулжа, ноябриин 15- да харгы ашаглалгада тушаахабди, - гэжэ подрядна эмхиин түлөөлэгшэ Алексей Третьяков хэлэбэ.
Баргажан хүрэтэр үшөө 66 модоной харгы заһабарилагдаха гэжэ түсэбөөр харалагданхай. Буряад Уласай засаг баригшад дансануудые бэлдэжэ, гүрэнэй шэнжэлэн шүүлгын албанайхид тэрэниие дэмжэһэн байна. Энэ хэрэгтэ 7 млрд. шахуу түхэриг мүнгэн гаргашалагдаха болоно. Ородой Холбоото Уласай Транспортын сайд Максим Соколов намар Буряад Улас дахин ерэхэдээ, энэ асуудалда харюу үгэхэ тухайгаа мэдүүлбэ.
