806
Буряад Уласай Арадай Хуралай ээлжээтэ 23-дахи сесси дээрэ уласай бюджедэй гаргаша ехэ болгогдобо. Эндэ Хэжэнгэ аймагай Дээдэ Хэжэнгын дунда һургуулида тамирай байшанай барилга оруулагдаба.
Буряад Уласай Толгойлогшын уялга дүүргэгшэ Алексей Цыденовэй албанай хэрэгээр Хэжэнгэ аймагаар ябахада, ажаһуугшад тамирай байшанай барилга дүүргэхэ хэрэгтэ туһа хүргэхыень гуйһан байна. Энэ асуудал Арадай Хуралай апрелиин сесси дээрэ зүбшэгдэхэ гэжэ Алексей Цыденов хэлэһэн байгаа.
- Буянтай хэрэг эхилһэн таанадта туһалжа шадаха байхабди , - гэжэ тэрэ хэлэһэн байгаа.
Апрелиин 27-до үнгэргэгдэһэн сесси дээрэ Арадай Хуралай һунгамалнууд Алексей Цыденовые дэмжэбэ. Тэдэнэр уласай бюджедтэ хубилалтануудые оруулба. Дээдэ Хэжэнгын дунда һургуулиин тамирай байшан барижа дүүргэлгэдэ, һуралсалай хэрэгсэлнүүдые абаха хэрэгтэ 10 млн. түхэриг мүнгэн һомологдохо юм.
Буряад Улас дотор Дээдэ Хэжэнгын һургуули эгээл түрүүн нээгдэһэн һургуулинуудай нэгэн юм. 2017 ондо энэ һургуули 100 жэлэйнгээ ойн баяр угтаха. Ойн баярта бэлдэжэ, һургуулиин байшан заһабарилагдаһан байна.
Дулаан, һаруул классууд соо үхибүүд һурадаг, теэд бэеэ һорихо, физкультурын хэшээлнүүдые үнгэргэхэ дулаан байшангүй байгаа. Һургуулиингаа ойн баяртай дашарамдуулан, Эдэрмэгэй ажаһуугшад өөһэдынгөө хүсөөр тамирай байшан бариха гэжэ шиидэһэн байна. Тамирай байшан ехэнхи хубинь бодхоогдонхой. Буряад Уласай Засагай газарай болон Арадай Хуралай дэмжэлгээр энэ барилга дүүргэгдэжэ, һуралсалай шэнэ жэлдэ ашаглалгада тушаагдаха болобо ха юм.
