​Николай Зубарев тушаалһаа бууба

Буряад Уласай Засагай газарай Түрүүлэгшын хангалгын байгууламжын хүгжэлтын талаар орлогшо Николай Зубарев тушаалһаа бууба.

Буряад Уласай Толгойлогшын уялга дүүргэгшэ Алексей Цыденов Николай Зубаревай тушаалаа сүлөөлһэн тухай тогтоол абаба. Буряад Уласай Засагай газарай Түрүүлэгшын хангалгын байгууламжын хүгжэлтын талаар орлогшо Николай Зубарев 2017 оной майн 5-һаа наһанайнгаа амаралтада гараһан ушараар мэдүүлгэ бэшэжэ, тушаалһаа бууба гэжэ тогтоол дотор бэшэгдэнхэй.

Николай Михайлович Зубарев Үбэр Байгалай хизаарай Шэтэ хотодо 1954 оной декабриин 18-да түрэһэн юм. Тэрэ Зүүн Сибириин технологическа дээдэ һургуулиин “Электроснабжение промышленных предприятий, городов и сельского хозяйства” болон “Менеджмент” гэһэн мэргэжэлнүүдтэ һураһан байна. Тэрэ 30-аад жэлдэ элшэ хүсэнэй һалбарида ажаллаһан юм. 26 жэлэй туршада Галуута нуурай ГРЭС- тэ хүдэлһэн байна. 2001 оной декабрь һарада “Федеральная сетевая компания Единой энергетической системы” гэһэн хуби ниилүүлһэн нээмэл бүлгэмэй таһагай Сибириин магистральна зайн галай утаһануудай Үбэр Байгалай үйлэдбэриин захиралаар томилогдоһон байха юм. 1998-2002, 2002-2007 онуудта Буряад Уласай Арадай Хуралай һунгамал байһан. 1999 ондо тэрэ экономикын эрдэмэй дид-дикторой нэрэ зэргэ хамгаалаа. 2010 ондо Буряадай гүрэнэй хүдөө ажахын экономико болон хуули ёһоной кафедрын профессор гэһэн нэрэ Николай Михайловичта олгогдоо.

Николай Михайлович “Ородой Холбоото Уласай элшэ хүсэнэй габьяата хүдэлмэрилэгшэ”, “Буряад Уласай элшэ хүсэнэй габьяата хүдэлмэрилэгшэ” гэһэн шагналнуудта хүртэһэн байна. Ородой Холбоото Уласай Элшэ хүсэнэй яаманай, “ФСК ЕЭС” гэһэн хуби ниилүүлһэн нээмэл бүлгэмэй, Буряад Уласай Хүндэлэлэй грамотануудаар тэрэ шагнагдаһан юм.

Буряад Уласай Толгойлогшын 2011 оной апрелиин 29-нэй тогтоолоор Николай Михайлович Зубарев Засагай газарай Түрүүлэгшын хангалгын байгууламжын хүгжэлтын талаар орлогшоор томилогдоһон юм.