1284
Ородой Холбоото Уласай Юрэнхылэгшэ Владимир Путин Бураяд Уласта мүльһэнэй ордон барилгын асуудал шиидхэхэ тухай даабари үгэжэ, энэ асуудалаар харюусаха хүнүүдые томилбо. Энээн тухай ОНФ-эй медиафорумой дүнгүүдээр Кремлиин сайтда хэблэгдээ.
“Ородой Холбоото Уласай Засагай газар Буряад Уласай Засагай газартай, Юрэнхылэгшын захиргаантай хамта Буряад Уласта мүльһэн ордон бариха тухай асуудал шиидхэхэ”, -гэжэ тус дансада бэшэгдэһэн байна.
Буряад Уласта мүльһэн ордон барилгын түлөө Буряад Уласай Толгойлогшын уялга дүүргэгшэ Алексей Цыденов, Ородой Холбоото Уласай Засагай газарай Түрүүлэгшын спортын талаар орлогшо Виталий Мутко болон Юрэнхылэгшын захиргаанай Түрүүлэгшын 1-дэхи орлогшо Сергей Кириенко гэгшэд харюусаха.
Буряад Уласта мүльһэнэй ордон бариха тухай асуудал ОНФ-эй медиафорумдо сурбалжалагша Саржана Бадмацыренова табиһан байна. Харюудань Владимир Путин Буряад Уласай Засагай газартай хамта ажал ябуулха тухайгаа хэлэһэн юм.
