887
Ородой Холбоото Уласай Юрэнхылэгшэ Владимир Путин Эрхүү хотодо майн 15-да можо нютагуудта тохёолдоһон онсо байдалай асуудалнуудай талаар зүблөө үнгэргэбэ. Уһанһаа болон түймэрнүүдһээ хохидоһон Уралай, Сибириин болон Алас Дурна зүгэй федеральна тойрогуудай түлөөлэгшэд эндэ хабаадаба.
Буряад Уласай Толгойлогшын уялга дүүргэгшэ Алексей Цыденов Байгал шадарай аймагай галда хохидоһон Черёмушки һууринда хэгдэжэ байһан заһабарилгын ажал тухай хөөрэбэ. Үшөө тиихэдэ, ойн түймэрэй аюултай хаһада һэргылэмжын ажал эршэтэйгээр ябуулагдажа, 2016 онтой жэшэн харахада, түймэртэ абтаһан талмайнууд дүрбэ дахин бага байна гэжэ Алексей Цыденов хэлэбэ.
- 2017 оной апрель һараһаа Буряад Уласай газар дайдада түймэрэй аюултай хаһын гурим соносхогдонхой. Ойн түймэртэ абтажа болохо 151 хүдөө нютагууд, 63 ДНТ болон 28 хүүгэдэй зунай лагерьнууд элирүүлэгдэнхэй. Түймэрэй аюултай хаһын эхилхэһээ урид, хүдөө нютагуудай паспортнууд суглуулагдаһан юм. Ойдо хамжаһан 4250 участогууд бүридхэлдэ абтаа. Март һараһаа май болотор “Ариг сэбэр ой” гэһэн 3 хэмжээ ябуулганууд 43 мянган хүнэй хабаадалгатайгаар үнгэргэгдэһэн байна. Бүхы хүдөө нютагуудта хатаһан модо гэшүүһэнһээ ой сэбэрлэгдээ, - гэжэ Ородой Холбоото Уласай Юрэнхылэгшэ Владимир Путинда Алексей Цыденов хэлэбэ.
Ойн түймэр һэргылхэ талаар Буряад Уласта 2400 хүнһээ бүридэһэн 570 бүлэгүүд байгуулагданхай. Эдэнэрэй эршэтэйгээр ажал ябуулхын тула тусхай хубсаһан, түймэр сарааха, холбоо бариха хэрэгсэлнүүд бэлдэгдэжэ, энцефалит үбшэнһөө һэргылэмжын тарилга хэгдэжэ, даадхалга хараалагданхай.
- Түймэрэй аюултай хаһын үедэ 4,5 мянган шалгалта эмхидхэгдэжэ, 10,5 мянган хүнүүдтэ һэргылэмжын ажал ябуулагдаһан байна. 189 гараһан түймэр сараагдажа, ойһоо 285 хүн гаргагдажа, 820 хүн ойдо оруулаагдаагүй юм, - гэжэ Алексей Цыденов тэмдэглэбэ.
Буряад Уласай Толгойлогшын уялга дүүргэгшэ Алексей Цыденовэй хэлэһэнэй ёһоор, гурим эбдэгшэдтэй ажал эршэдээ. Түймэрэй аюултай хаһын эхилһэнһээ хойшо 18 гэмтэ ябадалай хэрэг эрхилэгдэжэ, 12 ушараарнь, түймэр табиһан гэмтэд элирүүлэгдээ.
Хүдөө нютагуудые түймэрһөө аршалха хэрэгтэ 3408 хүнүүд хабаадажа, 428 түймэр сараадаг техникэ хэргэлэгдэһэн байна. Мүнөө дэээрэ Буряад Уласай дэбисхэр дээрэ 2 га талмайда гараһан түймэр бүридхэлдэ абтанхай. Бүхыдөө улас дотор 14 мянган га талмай галда дүрэһэн байна.
Байгал шадарай Черёмушки һуурин галда абтажа, тэндэ ябуулагдажа байһан ажал тухай Алексей Самбуевич хөөрэбэ.
Черёмушки һууринда болоһон түймэртэ 28 хото хорёо болон 19 гэр байра шатаһан байна. Эндэ 33 хүн ажаһуудаг байгаа.
- Гал аюулһаа хохидоһон хүн зондо уласай бюджетһээ арба арба мянган түхэриг һомологдоо. Федеральна һан жасаһаа арба арба мянган түхэригтэ 16 хүн, зуу зуу мянган түхэригтэ 10 хүн хүртэһэн байна. Байгал шадарай аймагай нютагай засагай байгууламжын һан жасаһаа арбан хүндэ 17 мянган түхэриг мүнгэн түлэгдэһэн байна. 5 хүн эмнэлгын газарта оронхой, - гэжэ Буряад Уласай Толгойлогшын уялга дүүргэгшэ хэлэһэн байна.
Түймэрэй һүүлээр Черёмушки һууринда һайн дураараа сугларһан хүнүүд, дүрэһэн шатаһан үлэгдэлнүүдые хуряажа, арилгаһан тухай Алексей Самбуевич хэлэбэ.
- 151 КАМАЗ машинаар Черёмушки һууринай бог шорой гаргадаа, - гэжэ Алексей Цыденов дуулгаба.
Мүнөө дээрэ 20 бүлэнүүд гэр байра барижа гү, али ондоо газарта худалдан абаха тухай мэдүүлгэ оруулаа. Уридшалан тоолоходо, гаргашалагдаха мүнгэн 31 млн. түхэриг болохо байна. 3 айл байрлаха ганса гэрээ алдаһан тухайгаа гэршэлээ .
2017 оной майн 2-то Алексей Цыденов Ородой Холбоото Уласай Юрэнхылэгшэ Владимир Путинтай Черёмушки һууринһаа сэхэ холбоодо гаража, хэгдэжэ байһан ажал тухайгаа хэлэһэн байна. Буряад Уласай болон Эрхүү можын дэбисхэр дээрэ түймэр болоһоной удаа Онсо байдалай талаар яаманай хабаадалгатайгаар зүблөөн үнгэргэгдэһэн байгаа. Тиихэдэ Владимир Путин Буряад Улас ерэжэ, бодхоогдоһон гэрнүүдые шалгаха түсэбтэй байһанаа дуулгаһан юм.
