1194
Мүнөөдэр, майн 16-да, Буряад Уласай Толгойлогшын уялга дүүргэгшэ Алексей Цыденов Байгал шадарай аймаг албанай хэрэгээр ябахадаа, Ородой Холбоото Уласай Юрэнхылэгшэ Владимир Путинай август һарын 2-дохи хахадта манай улас ерэхээр хүлеэгдэнэ гэжэ дуулгаба. Владимир Путинай ерэхэ саг тэрэнэй ажалай журамһаа дулдыдаха гэжэ Алексей Цыденов тэмдэглэбэ.
- Черёмушки һууринда заһабарилгын ажал хэр зэргэ ябуулагданаб гэжэ үсэгэлдэрэй зүблөөндэ Юрэнхылэгшэдэ хөөрэжэ үгөөб. Баргажан ошохо харгын заһабарилгые Владимир Путин дэмжэһэн байна. Тэрэ Транспортын яаманда энэ асуудал шиидхэхэ талаар даабари үгэбэ, - гэжэ Алексей Цыденов дуулгаба.
Ородой Холбоото Уласай Юрэнхылэгшэ Владимир Путин Эрхүү хотодо майн 15-да можо нютагуудта тохёолдоһон онсо байдалай асуудалнуудай талаар зүблөө үнгэргэбэ. Уһанһаа болон түймэрнүүдһээ хохидоһон Уралай, Сибириин болон Алас Дурна зүгэй федеральна тойрогуудай түлөөлэгшэд эндэ хабаадаһан байна. Буряад Уласай Толгойлогшын уялга дүүргэгшэ Алексей Цыденов ойн түймэрэй аюултай хаһын үедэ һэргылэмжын ажал эршэтэйгээр ябуулагдажа, 2016 онтой жэшэн харахада, түймэртэ абтаһан талмайнууд дүрбэ дахин бага байһан тухай тоосоһон байна.
Байгал далай хамгаалгын түб газарта оршодог хүдөө нютагуудые ойн түймэрһөө аршалхын тула, хуулиин ёһо баталан ой модо отолон абаха тухай дурадхал Алексей Цыденов оруулба. Урид абтаһан хуулиин ёһоор, 146 хүдөө нютагууд ойн түймэрэй аюултай газартай оршодог тула, тэрээнһээ аршалагдаха аргагүй юм гэжэ Буряад Уласай Толгойлогшын уялга дүүргэгшэ хэлэбэ.
Кremlin.ru сайтһаа гэрэл зураг абтаба.
