655
Буряад Уласай Толгойлогшын уялга дүүргэгшэ Алексей Цыденовэй тушаалда томилогдоһоорнь 100 үдэр үнгэршэбэ. Эдэ үдэрнүүдтэ тэрэнэй ябуулһан ажалынь хаража, мэргэжэлтэ шүүбэришэд Алексей Самбуевич тухай һанамжаараа хубаалдаһан байна.
- Зуун үдэртэ ябуулһан ажалайнь үрэ дүнгүүдые хаража, Алексей Цыденов ёһотой политик боложо, эрхим хүтэлбэрилэгшэ байһанааа харуулба. Эрдэм ухаатай, ажал хэхэдээ бэрхэ хүн гэжэ ойлгохоор. Тиихэдээ, Алексей Цыденовэй федеральна засаг зургаанда олон танилтай байһыень, нэгэнтэ бэшэ хараабди.
Федеральна түбһөө тэрэниие дэмжэнэ. Энэнь гайхалгүй. Тиихэдээ, тусхай хүнүүдтэ, хэхэ ажалдань мүнгэн һомологдоно гэжэ һанаха шухала. Саашадаа ажабайдалаа һайжаруулха гэбэл, хэниие дэмжэхээр бэ гэжэ ойлгогдоно.
Арадай Хуралтай Алексей Цыденов суг ажалаа ябуулна. Тэрэнэй үүсхэлээр һунгамалнууд бюджедтэ шухала заһабарилгануудые оруулһан байна. Тэрэ хүнүүдээр хөөрэлдэжэ, шагнажа шадаха, тиигэбэшье шухала асуудалнуудаар өөрынгөө һанамжа алдадаггүй. Тэрэ үлүү шууяа гаргадаггүй хүн. Алексей Самбуевич һунгалтада хабаадахын хажуугаар, олон асуудалнуудые шиидхэхэ байна. Уласаа яажа хүгжөөхэб, суг хүдэлхэ команда байгуулжа, тэрэнэй үдэр бүриин ажалай гурим зохёохо гэхэ мэтэ болоно, - гэжэ Буряад Уласай Арадай Хуралай һунгамал Баир Дашиевич Цыренов хэлэбэ.
Буряадай гүрэнэй ехэ һургуулиин бодолгын хубилалтануудые шэнжэлдэг түбэй захирал Алексей Михалёв иигэжэ хэлэбэ:
- Буряад Уласай Толгойлогшын уялга дүүргэгшын ажалайнь дүн гаргаха эртэ гэжэ һананаб. Һунгалтын үнгэрһэнэй удаа дүнгүүдые согсолхоор. Түүхын хуудаһа ирабал, эгээ түрүүн Наполеоной 100 үдэрэй ажалай дүн гаргагдаһан байна. Удаань Америкэдэ иимэ заншалтай болоо. Тиигэбэшье Алексей Самбуевичай эдэ үдэрнүүдтэ туйлаһан амжалтанууд бии. Тэрэ эдэбхитэй, ажалша хүн, теэд урагшатайгаар ажал ябуулһан хүниие шүүмжэлдэг ааб даа. Тиимэһээ Алексей Цыденовэй ажаябуулга оппозици шүүмжэлнэ. Эдэбхитэйгээр хабаадажа, асуудалнуудые шиидхэхэ гэһэн тэрэнэй холын хараата түсэб зүб гэжэ һананаб.
Буряадай гүрэнэй ехэ һургуулиин профессор, социологиин эрдэмэй доктор Эрдэм Дагбаев иимэ һанамжатай байна:
-Буряад Уласта ажаһуугшадай зүрилдөтэ асуудалнуудые шиидхэжэ, бэелүүлжэ шадахаб гэжэ Алексей Цыденов бэеэ харуулаа. Буряад Уласай Толгойлогшын уялга дүүргэгшэ 100 үдэрэй туршада олон түсэлнүүдые бэелүүлгэдэ федеральна бюджетһээ мүнгэ абажа шадаһан байна. Нэрлэбэл, улас дотор болон Улаан-Үдэдэ хыргынуудые заһабарилга, сэбэрлэлэгын түхеэрэлгэнүүдые һэльбэн шэнэдхэлгэ, зайн галай түлбэри бага болголго гэхэ мэтэ. Федеральна засаг зургаануудтай нягта холбоотой, асуудалнуудые шиидхэхэ дүй дүршэлтэй байһаниинь, маанадта, Буряад уласай ажаһуугшадта сэнтэй.
Ородой Холбоото Уласай Юрэнхылэгшэ Владимир Путин Алексей Цыденовые дэмжэнэ. Алексей Цыденовэй аймагуудаар ябажа, шиидхэхэ асуудалнуудые байра дээрэээ элирүүлжэ, заатагүй бэелүүлхэбди, дүүргэхэбди гэжэ үгэеэ үгэдэггүйнь һайшаалтай. Тиихэдээ аймагуудта удха шанартай түсэлнүүдые тэрэ дэмжэһэн байна.
Хүнүүдээр харилсахадаа, Алексей Самбуевич юрэл хөөрэлдэдэг. Хэжэнгэдэ залуушуултай хамта дуу дуулажа, тэрэнь һайшаагдаа. Буряад Уласай Толгойлогшын уялга дүүргэгшэ Соведүүдэй талмай дээрэ ажаһуугшадтай хамтай “Байгал” ансамблиин илалтын баяр хубаалдажа, үбгэ эсэгэнэрэйнгээ гэрэл зурагуудые барижа, Хэтын жагсаалда хабаадаһан байна.
Тиихэ зуура, тэрэнэй залуу политик байһыень ойлгонобди. Алексей Цыденов уласаа хүгжөөхэ холын бодолой түсэбөөрөө хубаалдаха саг ерээ гэжэ һананаб. Буряад Уласай Толгойлогшо болохо түсэбтэй һаа, тэрэ оппозици, олониитын эмхинүүд болон бодолгын намуудтай нягта харилсаха болоно.
Ородой Холбоото Уласай Юрэнхылэгшэ Владимир Путин Алексей Цыденовые Буряад Уласай Толгойлогшын тушаалда 2017 февралиин 7-до томилһон байна гэжэ һануулнабди.
Анна Огороднигой гэрэл зураг
