1031
Июниин 1-дэ Үхибүүдые хамгаалгын уласхоорондын үдэр тэмдэглэгдэдэг. Буряад Уласай Толгойлогшын уялга дүүргэгшэ Алексей Цыденов энэ һайндэрөөр амаршалжа, ерээдүйдэ гүрэн түрэеэ хүтэлбэрилхэ, хүгжөөхэ, талха таряа ургуулха эдиршүүлэйнгээ урда харюусалгатай байхыемнай энэ һайндэр һануулна гэжэ тэмдэглэбэ.
Ородой Холбоото Уласай Юрэнхылэгшэ Владимир Путин хүүгэдые хамгаалха асуудалаар гүрэнэй бодолго нарижуулха гэжэ бага наһанай 10 жэл гэһэн тогтоол абаһан байна гэжэ Алексей Цыденов һануулба. Тиихэдэ Владимир Путин сайдуудта хоёр жэлэй туршада ябуулагдаха ажалай түсэб табиха гэһэн даабари үгэһэн байна. Алексей Цыденовэй хэлэһэнэй ёһоор, ургажа ябаһан үхибүүдые хуулиин, ниигэмэй талаар аршалжа, дүрбэн тэгшээр хүмүүжүүлхэ гэжэ Ородой Холбоото Уласай гүрэнэй бодолгын түрүү асуудалнуудай нэгэн байһаниинь гэршэлэгдэнэ.
- Манай гүрэн дотор гэр бүлэ, эжынэрые, багашуулые дэмжэхэ, хүмүүжүүлхэ асуудалнуудта ехэ анхарал хандуулагдадаг. Имагтал гэр бүлэнүүдтэ үхибүүнэй оршон тойронхи байдалда хандаса хүмүүжүүлэгдэнэ.
Буряад Уласта ургажа ябаһан улаа бургааһадые дэмжэхэ талаар ажал ябуулагдана. Һургуулинууд баригдана, шэнэдхэгдэнэ, оньһон техникээр хангагдана. Зунай амаралтын үдэрнүүдтэ хүндэ байдалда ороһон 78 мянган шахуу үхибүүд элүүржүүлгын лагерьнуудта амарха юм.
Хүндэтэ үхибүүд, танай һураха, амарха, һонирхолтойгоор сүлөө сагаа үнгэргэхэ аргатай байхытнай тулада оролдохобди. Элүүр энхэ, эрдэм болбосоролтой, бэлиг талаантай, түрэл нютагтаа дуратай, Буряадай омогорхол боложо ябахынтнай тулада ажалаа ябуулхабди. Аба эжынэртэ, хүгшэн баабай эжынэртэ, үхибүүдые хүмүүжүүлэгшэдтэ, үхибүүдые үргэжэ абаһан гэр бүлэнүүдтэ баяраа мэдүүлнэб.
Майн 31-дэ Ородой Холбоото Уласай Юрэнхылэгшэ Владимир Путин Гусиноозёрск хотын Евгений Валерьевич, Зоя Михайловна Седуновтониие “Родительская слава” гэһэн орденоор шагнаһан байна. Хүн зондо жэшээ болоһон гэр бүлэ 9 үхибүүдые хүмүүжүүлжэ, олон үхибүүтэй гэр бүлэнүүдтэ, үншэн үхибүүдтэ туһа хүргэжэ байдаг.
Хүндэтэ нютагаархид, таанарые, хүүгэдыетнай һайндэрөөр амаршалжа, элүүр энхэ, аза талаантай, зол жаргалтай ябахыетнай хүсэнэб. Үхибүүд, зунай амаралтын үдэрнүүдтэ хүхюу сэнгүүтэйгээр амаржа, олон нүхэдөөр танилсажа, удаадахи һуралсалай жэлдэ хүсэ шадалтай, омог дорюун ябахатнай болтогой,- гэжэ Буряад Уласай Толгойлогшын уялга дүүргэгшэ Алексей Цыденов хэлэбэ.
Буряад Уласай Засагай газарай сайтһаа гэрэл зураг абтаба.
