889
Ородой Холбоото Уласай Юрэнхылэгшэ Владимир Путин “Родительская слава” гэһэн орденоор олон үхибүүтэй гэр бүлэнүүдые шагнаба.
Буряад Уласай Гусиноозёрск хотын Евгений, Зоя Седуновтоной гэр бүлэ үндэр шагналда хүртэбэ. Тэдэнэр юһэн үхибүүдые хүмүүжүүлжэ, үншэн үхибүүдтэ болон олон үхибүүдтэй гэр бүлэнүүдтэ туһа хүргэдэг юм.
Владимир Путинай тэмдэглэһэнэй ёһоор, үхибүүдые хүмүүжүүлгэ, тэдэнэй бэлиг шадабари хүгжөөлгэ хадаа хүнүүдэй, гэр бүлэнүүдэй болон ниитын ажаябуулгын хүгжэхэ, дабшаха гол шалтагаануудай нэгэн болоно. Ород гүрэн дотор һүүлэй жэлнүүдтэ хоёрһоо дээшэ үхибүүдые хүмүүжүүлжэ байһан гэр бүлэнүүд олон болоно. Үшөө тиихэдэ, үхибүүдые үргэжэ абаһан хүнүүдэй тоо олошороо.
- Олон үхибүүдтэй байхада, жаргалтай юм ааб даа. Харин энэмнай аргагүй ехэ харюусалгатай, амаралтын үдэрнүүд гэжэ байдаггүй ажал мүн. Үхибүүдэй хүмүүжүүлгэ таанадта шухала, - гэжэ Владимир Путин түрэлхидтэ хандаба.
“Родительская слава” гэһэн орденоор шагнагдаһан Евгений Седунов баярай үгэнүүдые иигэжэ хэлэбэ:
- Энэ шагналда хүртөөд байхадаа, гүрэн түрын, бурханай алдар үргэдхэн хэһэн ажални сэгнэгдэбэ. Саашадаа, үхибүүдээ Эхэ орондоо туһатай байхаар хүмүүжүүлхэеэ оролдохобди.
Энэ ёһололдо Буряад Уласай Толгойлогшын уялга дүүргэгшэ Алексей Цыденов Седуновтоной гэр бүлэтэй хамта хабаадалсаһан байна. Евгений олон зондо жэшээ боложо, иимэ хүнүүдэй олон байбал һайшааалтай гэжэ Алексей Самбуевич тэмдэглэбэ.
2008 оной май һарада Юрэнхылэгшын тогтоолоор “Родительская слава” гэһэн орден байгуулагдаһан юм. Энэ шагналда долоонһоо дээшэ үхибүүдые, хүмүүжүүлһэн, хүмүүжүүлжэ байһан түрэлхид хүртэдэг юм.
Үхибүүдые хүмүүжүүлхэ габьяагай түлөө Ородой Холбоото Уласай можо нютагуудай гэр бүлэнүүд шагнадаба.
Ородой Холбоото Уласай Юрэнхылэгшын мэдээсэлэй албанай сайтһаа гэрэл зураг абтаба.
