718
Буряад Уласай Түнхэн аймагай Хэрэн нютагта аймагай өөһэдын хүтэлбэриин зүблөөн Арадай Хуралай һунгамалнуудай хабаадалгатайгаар үнгэргэдэбэ. Энэ хэмжээ ябуулгада аймагуудай соведэй түрүүлэгшэнэр ерэжэ хабаадаба.
Зүблөөндэ хоёр шухала асуудалнууд зүбшэн хэлсэгдэһэн байна. Нэгэдэхинь гэхэдэ, хүдөө нютагта соёл урлаг яажа хүгжэнэб, хоёрдохи асуудал бюджедэй мүнгэнэй хубаари болобо.
- Мүнөө хоёр ехэ асуудал харабабди. Нэгэдэхинь гэхэдэ, хүдөө нютагта соёл урлаг яажа хүгжэнэб, соёл тухай хуули яажа бэелүүлэгдэнэб гэжэ хэлсэбэбди. Хүдөө нютагуудай соёлой, номой сангай байшангуудай 36 %-нь үмхирэнхэй. Саашадай уласай, нютагай өөһэдын хүтэлбэри энэ асуудалаар шиидхэбэри абажа, заһабарилгын ажал ябуулаагүй һаамнай, эдэмнай саашадаа хуу һандарха. Энэ ажал ябуулгада мүнгэ һомолжо, заһабарилга хэгдэхэ ёһотой гэһэн асуудал табигдана.
Аймагуудта татабариин мүнгэн яажа хубаагданаб гэһэн асуудалаар баһа ехэ тоосолдоон болобо. Бюджедэй хоорондын харилсаанай хуули яажа бэелүүлэгдэнэб гэжэ Мүнгэн сангай сайдай орлогшо элидхэбэ. Улаан-Үдын түлөөлэгшэд татабариин ехэнхи хуби хотодо үлээгыт гэһэн дурадхал аймагуудай хүтэлбэрилэгшэд энээнииень буруушаба.
Эдэ асуудалнуудаар зүблөөн эмхидхэгдэжэ, октябриин 20-доор үнгэргэгдэхэ съезддэ шиидхэгдэхэ. Тиихэдээ, бүхы һунгамалнууд, сенаторнууд, гүрэнэй Дүүмын һунгамалнууд энэ хэмжээ ябуулгада хабаадаха, - Арадай Хуралай түрүүлэгшэ Цырен-Даша Доржиев хэлэбэ.
Буряад Уласай Арадай Хуралай сайтһаа гэрэл зураг абтаба.
