884
Үсэгэлдэр, февралиин 26-да, Ородой Холбоото Уласай Засагай газарай Түрүүлэгшын баталан хамгаалгын-үйлэдбэрииин комплексын асуудалнуудаар орлогшо Юрий Борисов албанай хэрэгээр Улаан-Үдэ ерэһэн байна.
Юрий Борисов Улаан-Үдын авиационно заводто хүрэжэ, ажалтайнь танилсаа. Заводто Энэдхэг ороной тусхай захилаар Ка-226.54 түхэлэй вертолёт бүтээгдэнэ. Тиихэдэ Юрий Борисовто Ми-171А2 шэнэ түхэлэй вертолёт харуулһан байна.
Удаань сайд заводой хүгжэлтын, гүрэнэй захилай болон түсэлнүүдые бэелүүлхэ талаар зүблөө үнгэргөө. Зүблөөндэ Ми-8 түхэлэй вертолёт, ТВС-2ДТС «Байкал» түхэлэй самолёт мүнөө үеын эрилтэнүүдтэ тааруу болгоожо шэнэлхэ тухай хэлсэбэ.
- ТВС-2ДТС түхэлэй самолёт шэнэлхэ мүнгэн хараалагданхай. Тиимэһээ ямар ажал хэгдэхэб гэжэ хэлсэхэбди. Баталагдаһан хэлсээнүүдэй ёһоор, 2021 он болотор ажал хэгдэхэ гэжэ уридшалан түсэб табигданхай, - гэжэ Буряад Уласай Толгойлогшо Алексей Цыденов хэлэбэ
Ородой Холбоото Уласай Юрэнхылэгшэ Владимир Путинай баталан хамгаалгын-үйлэдбэрииин комплексын ажал үргэдхэхэ гэһэн даалгабаряар Улаан-Үдын авиазавод түсэлнүүдые бэлдэнэ гэжэ вице-премьер тэмдэглэбэ.
Хуби ниилүүлһэн «Вертолёты России» бүлгэм, тэрэ тоодо Улаан-Үдын авиазавод, гансашье сэрэгтэ хэрэглэгдэхэ вертолёдуудые үйлэдбэрилнэ бэшэ, харин амгалан ажабайдалда хэрэглэгдэхэ 30 вертолёт үйлэдбэрилөө.
- Улаан-Үдын авиазаводто ажалаа гуримтайгаар, хэлсэһэн болзортоо дүүргэдэг. Нэгэшье дахин ажал бүтээгдээгүй гэһэн асуудал гараагүй, тиихэдэ болзорһоо урид дүүргээд лэ байдаг. Баталан хамгаалгын яаманда эндэ үйлэдбэрилһэн вертолёдуудаар дүүрэн хангагдаа. Арктикада шэнгэн түлишэ олзоборилхо асуудал гаража, завод шэнэ амисхаал орожо, ажалаа ябуулха. Тиихэдэ ТВС-2ДТС түхэлэй самолёт үрдилдэн тэмсэхэ аргатай һаань, һэльбэн шэнэлхэ түсэл бэелүүлэгдэхэ. Энэ талаар ажал ябуулагдаха, - гэжэ Ородой Холбоото Уласай Засагай газарай Түрүүлэгшын баталан хамгаалгын-үйлэдбэрииин комплексын асуудалнуудаар орлогшо Юрий Борисов хэлэбэ.
