727
Буряад Уласай Толгойлогшын уялгануудые дүүргэгшэ Алексей Цыденов албанай хэрэгээр Түнхэн аймагаар ябахадаа, Билдаевай нэрэмжэтэ Аршаанай дунда һургуули хүрэбэ.
Һургуулиин захирал Дашима Дамдинова һургуули тухайгаа, шиидхэгдэхэ асуудалнууд тухайгаа Алексей Цыденовтэ хөөрэбэ.
218 һурагшадай багтаха байшанда, 630 үхибүүд 3 ээлжээндэ һурадаг байна. Тиихэдэ һургуулиин байшан үнгэрһэн зуун жэлэй 70-аад онуудаар баригданхай юм. Жэл бүри хинадаг албангууд олон тоото заабаринуудые бэшэдэг, теэд тэдэниинь дулдышагүй шалтаганаар бэелүүлэгдэхэ аргагүй.
Түнхэн аймагта орёо асуудалнуудай нэгэн хадаа газарай асуудал болоно. Юундэб гэхэдэ, Түнхэн аймагай дэбисхэр бүхыдөө дархан газар болодог юм. Тиимэһээ эндэ газар нютагай засагай гү, али хубиин мэдэлтэй болгохын аргагүй шахуу.
Буряад Уласай Толгойлогшын уялгануудые дүүргэгшэ Алексей Цыденов хэлэһэнэй ёһоор, һургуулида залгажа барилга хэбэшье, энэ асуудал шиидхэгдэхэгүй. Юундэб гэхэдэ, һургуулиин талмайн бага байһанһаа хэшээлһээ гадуур хэмжээ ябуулгануудые, нэмэлтэ һуралсалай хэшээлнүүдые үнгэргэхэ арга боломжогүй юм. Энэ асуудал хараалагдаха гэжэ тэрэ тэмдэглэбэ.
Мүнөө жэлэй һургуули дүүргэгшэ 30 үхибүүдэй 5-ниинь медальда хүртөө. Гүрэнэй ниитэ нэгэ шалгалта тушаажа, нэгэниинь ород хэлээр 100 балл абаһан байна.
Мүнөөдэр Буряад Уласай Толгойлогшын уялгануудые дүүргэгшэ Алексей Цыденов албанай хэрэгээр Түнхэнэй аймаг гаража, Вышка һууринай аяншалгын хангалгын байгууламжа болон Загта нютагай “Сахатка” гэһэн хадаһаа һолжорхо комплекс хараба. Удаань Алексей Цыденов болон Засагай газарай түлөөлэгшэд Аршан һууринай соёлой-тамирай комплекс болон курорт “Аршан” гэһэн эмхи зургаануудта хүрэхэ юм. Тиихэдэ ТОС-уудай түрүүшүүл, ажаһуугшад, аймагай зүблэлэй һунгамалнууд болон һомоной дарганартай уулзалга үнгэргэгдэхэ. Тиихэдэ Буряад Уласай Толгойлогшын уялгануудые дүүргэгшэ Алексей Цыденов Монды тосхоной фельдшерскэ-акушерскэ, Ород, Монгол гүрэнүүдэй хилэ автомашинын гарадаг “Монды” пунктнуудта хүрэхэ.
Үдэшэлэн Алексей Цыденов Аха аймаг гараха түсэбтэй.
