1071
Ородой Холбоото Уласай Юрэнхылэгшэ Владимир Путин болон Баталан хамгаалгын сайд Сергей Шойгу гэгшэдтэй хэлсэжэ, “Аршаан” курорт Баталан хамгаалгын яаманда дамжуулха тухай Аршаан һууринай ажаһуугшад Алексей Цыденовтэ дурадхаба.
“Аршаан” курорт хадаа Буряад Уласай Профсоюзуудай эмхинүүдэй нэгэдэлэй эмхидхэн байгуулһан “Байкалкурорт” гээһн эмхи зургаанай мэдэлдэ юм. Ехэ үри шэритэй курортын хүтэлбэри болон хүдэлмэрилэгшэд олон зоной амардаг газар хүгжөөхэ гэжэ арга боломжонуудые бэдэрнэ. Шахардуу байдалда ороһон курортын хүдэлмэрилэгшэд һанаата болоһон тухайгаа Буряад Уласай Толгойлогшын уялгануудые дүүргэгшэ Алексей Цыденовтэ дуулгаба.
Ахамад эмшэн Алексей Викторовой хэлэһээр, “Аршаан” курорт хүгжөөхын тула гүрэнэй хабаадалгатай федеральна засаг зургаанһаа мүнгэн һомологдобол туһатай байха. Энэ асуудалаар зохистой шиидхэбэри абтабал, “Аршаан” федеральна хэмжээнэй албан газарай эмхи зургаан боложо, Ородой Холбоото Уласай Зэбсэгтэ хүсэнүүдэй хүдэлмэрилэгшэд эндэ амарха аргатай болохо гэжэ ажаһуугшад тэмдэглэбэ.
Онсо шухаг курорт һандаргангүй, хүгжөөхэ талаар олон арга боломжонуудые хараалха тухайгаа Буряад Уласай Толгойлогшын уялгануудые дүүргэгшэ Алексей Цыденов хэлэбэ.
“Байкалкурортдо” хабаатай “Аршаан”, “Горячинск” курортнуудай мүнгэн һангай шахардуу байдалда ороһонһоонь боложо, Буряад Уласай Тоололгын танхим энэ эмхи зургааниие шалгаха гэһэн шиидхэбэри Алексей Цыденов абаһан байна гэжэ һануулнабди.
Удаань Алексей Цыденов болон Засагай газарай түлөөлэгшэд Аршан һууринай ниигэмэй удха шанартай эмхи зургаануудта хүрэхэ юм. Тиихэдэ ТОС-уудай түрүүшүүл, ажаһуугшад, аймагай зүблэлэй һунгамалнууд болон һомоной дарганартай уулзалга үнгэргэгдэхэ. Тиихэдэ Буряад Уласай Толгойлогшын уялгануудые дүүргэгшэ Алексей Цыденов Монды тосхоной фельдшерско-акушерскэ, Ород, Монгол гүрэнүүдэй хилын автомашинын гарадаг “Монды” пунктнуудта хүрэхэ.
Үдэшэлэн Алексей Цыденов Аха аймаг гараха түсэбтэй.
