1044
Буряад Уласай Толгойлогшын уялгануудые дүүргэгшэ Алексей Цыденовэй Түнхэн аймагай түб Хэрэн һууринай ажаһуугшадтай уулзалга эхилбэ.
Буряад Уласай Толгойлогшын уялгануудые дүүргэгшэ Алексей Цыденов аймаг доторхи ажабайдал тухай тобшохоноор хөөрэжэ, “асуудал-харюу” маягаар энэ уулзалга үнгэргэхэ тухай дурадхаба. Тиихэдэ ажаһуугшад һанаа бодол эзэлдэг ямаршье асуудалнуудые һураха аргатай байба.
Хэрэндэ үнгэргэгдэхэ уулзалгын урда тээ Алексей Цыденов Түнхэн нютагай ажаһуугшадтай, аймагай ТОС-уудай эдэбхитэдтэй уулзаһан байна. Харгы заһабарилга, хүүргэ, һургуули барилга тухай болон бусад асуудалнуудые Алексей Цыденовһээ ажаһуугшад һураба. Буряад Уласай Толгойлогшын уялгануудые дүүргэгшэ Алексей Цыденовэй хэлэһэнэй ёһоор, эндэ хэлэгдэһэн асуудалнууд албанай хэрэгэй протоколдо оруулагдажа, яаманууд, һомоной засагай байгууламжануудай захиргаануудта хараалагдажа, шиидхэбэринүүд абтаха юм.
Мүнөө дээрээ “Аршаан” курортын олон миллионто үри шэрэ орёо асуудалнуудай нэгэн юм гэжэ һануулнабди. Ородой Холбоото Уласай Юрэнхылэгшэ Владимир Путин болон Баталан Хамгаалгын яаманай сайд Сергей Шойгу гэгшэдтэй хэлсэжэ, Баталан хамгаалгын яаманда “Аршаан” курорт дамжуулха тухай хүтэлбэрилэгшэд болон хүдэлмэрилэгшэд хэлэһэн байна. Энэ асуудалаар зохистой шиидхэбэри абтабал, “Аршаан” федеральна хэмжээнэй албан газарай эмхи зургаан боложо, Ородой Холбоото Уласай Зэбсэгтэ хүсэнүүдэй хүдэлмэрилэгшэд эндэ амарха аргатай болохо гэжэ ажаһуугшад тэмдэглэбэ.
Василий Цыбиковэй гэрэл зураг.
