1065
Түнхэн аймгай Хэрэн һууринда Буряад Уласай Толгойлогшын уялгануудые дүүргэгшэ Алексей Цыденов ажаһуугшадтай уулзаба. Энэ уулзалгын үедэ Шумагай аршаанда хүрэхөөр бэшэ, сагдаанар болон дархан газарай хинан харагшад ажаһуугшадыешье, аяншалагшадыешье аршаанда оруулнагүй гэжэ Түнхэн аймагай арад зон хэлэбэ.
Буряад Уласай Толгойлогшын уялгануудые дүүргэгшэ Алексей Цыденовэй 2017 оной июниин 14-нэй тогтоолоор, уласай дэбисхэртэ түймэрэй аюултай хаһын онсо байдал соносхогдонхой гэжэ Байгаалиин нөөсэнүүдэй сайдай уялгануудые дүүргэгшэ Юрий Сафьянов һануулба.
Эрхүү хотын фирмын удаан болзорой түрээсэдэ аршаанта газарай нэгэ хубинь мэдэлдэ байна гэжэ ажаһуугшад дурагүйлхэнэ. Тэдэнэй тэмдэглэһээр, энэ фирмын эзэн ерээдүйдэ аршаанта газар бүхыдөө тэрэнэй мэдэлэй болохо гэжэ хэлэһэн байха юм.
Буряад Уласай Толгойлогшын уялгануудые дүүргэгшэ Алексей Цыденов Шумак хүрэжэ, тохёолдоһон байдалаар шиидхэхэ тухайгаа хэлэбэ.
Буряад Уласай Толгойлогшын уялгануудые дүүргэгшэ Алексей Цыденов аймаг доторхи ажабайдал тухай тобшохоноор хөөрэжэ, “асуудал-харюу” маягаар энэ уулзалга үнгэргэхэ тухай дурадхаба. Тиихэдэ ажаһуугшад һанаа бодол эзэлдэг ямаршье асуудалнуудые һураха аргатай байба гэжэ һануулнабди. Алексей Цыденовэй хэлэһэнэй ёһоор, эндэ хэлэгдэһэн асуудалнууд албанай хэрэгэй протоколдо оруулагдажа, яаманууд, һомоной засагай байгууламжануудай захиргаануудта хараалагдажа, шиидхэбэринүүд абтаха юм.
Буряад Уласай Засагай газарай сайтһаа гэрэл зураг абтаба.
