988
Буряад Уласай Толгойлогшын уялгануудые дүүргэгшэ Алексей Цыденов Түнхэн аймагай зүблэлэй һунгамалнуудтай болон һомонуудай дарганартай уулзаба.
Түнхэн аймагта орёо асуудалнуудай нэгэн хадаа газарай асуудал болоно. Юундэб гэхэдэ, Түнхэн аймагай дэбисхэр бүхыдөө дархан газар болодог. Тиимэһээ эндэ газар нютагай засагай гү, али хубиин мэдэлтэй болгохын аргагүй шахуу юм. Тиимэһээ энэ асуудалаар Буряад Уласай Толгойлогшын уялгануудые дүүргэгшэ Алексей Цыденов Түнхэн аймагай зүблэлэй һунгамалнуудтай болон һомонуудай дарганартай энэ асуудалаар зүбшэн хэлсэбэ гэжэ Буряад Үнэнэй мэдээсэлэй албан байраһаа дуулгана. Энэ асуудал орёо, тиигэбэшье нютагай засагай байгууламжын ажаһуугшадые хохидолдо оруулангүй шиидхэхэ хэрэгтэй гэжэ Алексей Цыденов тэмдэглэбэ.
Түнхэнэй үндэһэтэнэй дархан газарай захирал Валерий Гулгоновой хэлэһээр, Түнхэй аймагай хилэ Захаамин, Аха аймагуудай газар хэрэглэн хубилгабал, асуудал шиидхэгдэхэгүй. Юундэб гэхэдэ, дархан газарай мэдэлһээ гаргагдаһан хүдөө нютагуудай, хүдөө ажахын газарнууд болон хүн зон Түнхэн аймагай ажаһуугшад бэшэ гэжэ тоологдожо, түлеэгээшье бэлдэхэ эрхэгүй болохо юм.
- Мүнөөдэрэй байдалаар, дархан газар ойн ажахын уялгануудые дүүргэнэ. Түнхэнэй ажаһуугшад ямаршье түлбэригүйгөөр ойн баялиг хэрэглэнэ. Үхэр малаа адуулна, - гэжэ Валерий Гулгонов тэмдэглэнэ.
Түнхэнэй дархан газарай хилэ хубилгахада, эдэ хүнгэлэлтэнүүд хүсэеэ алдаха юм.
Буряад Уласай Толгойлогшын уялгануудые дүүргэгшэ Алексей Цыденовэй хэлэһээр, энэ асуудалаар һонирхоһон хүнүүдые урижа, ажалай зүблөөнүүд үнгэргэгдэхэ. Ородой Холбоото Уласай Юрэнхылэгшэ Владимир Путинай ерэхэ болзорто, энэ орёо асуудал яажа шиидхэхэб гэһэн хандалга бэлдэхэ гэжэ түсэблэгдэнхэй.
Тиихэдэ, ниигэмэй удха шанартай барилгын асуудалнууд, тэрэнэй тоодо Жемчуг һууринда амбулатори, фельдшерскэ-акушерскэ пункт бариха, зайн галаар хангалгын шанар тухай гэхэ мэтэ асуудалнуудаар уулзалгада зүбшэбэ.
Аршаанда болоһон хадаһаа бууһан байгаалиин аюулда хохидоһон нютагта хойшолонгуудые усадхаһан тухай, энэ аюулда абтажа, саг соогоо туһаламжа үзүүлэгдээгүй 2 гэр бүлэнүүдтэ туһа хүргэлгэ гэхэ мэтэ асуудалнуудаар Буряад Уласай Толгойлогшын уялгануудые дүүргэгшэ аймагай зүблэлэй һунгамалнуудтай болон һомонуудай дарганартай зүбшэн хэлсэбэ.
Мүнөөдэртөө Алексей Цыденов Ниловка болон Монды нютагуудта аяншалгын хангалгын байгууламжын болон ниигэмэй удха шанартай газарнуудта, Монгол, Ород гүрэнүүдэй хилын автомашинануудай гараха пунктда хүрэхэ юм.
Артём Федотовой гэрэл зураг.
