979
Буряад Уласай Толгойлогшын уялгануудые дүүргэгшэ Алексей Цыденов албанай хэрэгээр Аха аймаг ерэнхэй.
Мүнөөдэр, июлиин 4-дэ, Аха аймагай Өөрлиг һууринда залуушуул болон тамиршадтай уулзалгын үедэ Сибириин үсөөн тоото үндэһэн арадуудай нэгэн болохо һоёд арадай заншалта тамирай наадануудые Буряад Уласай Толгойлогшын уялгануудые дүүргэгшэ Алексей Цыденовтэ харуулһан байна. Алексей Цыденов бугуули шэдэлгэ, хүнгэн шарга дээгүүр һүрэлгэ, тэбэг болон һээр шаалганда хаба шадалаа туршаба гэжэ Буряад Yнэнэй мэдээсэлэй албан дуулгана.
Түнхэн аймагаар албанай хэрэгээр ябаһанай удаа, үсэгэлдэр үдэшэ Алексей Цыденов Аха ерэһэн байна гэжэ һануулнабди. Мүнөө үглөөгүүр “Бурятзолото” гэһэн хуби ниилүүлһэн нээмэл бүлгэмэй Аха аймагай “Холбинский” гэһэн алтанай уурхайн олзоборилогшодтой тэрэ уулзажа, ажалай зүблөө үнгэргэһэн байна.
Буряад Уласай Толгойлогшын уялгануудые дүүргэгшэ Алексей Цыденов “Сойотское” гэһэн һомоной Сорог һуурин хүрэжэ, тэндэ Сорогой интернат-һургуули, “Улыбка” гэһэн хүүгэдэй сэсэрлигэй һандаржа хаагдаһан байшан хараһан байна. Үхибүүдэй мүнөө сэсэрлигтэ ябажа байһан саг зуурын байшануудта Алексей Самбуевич хүрэбэ.
Тиихэдэ Сорогой эмнэлгын амбулатори, “Эрчинэ” гэһэн һоёдуудай үндэһэтэнэй комплекс Алексей Цыденов хараба.
Анна Огороднигой гэрэл зураг.
