735
Москва хотын үндэһэтэнэй бодолгын департаментын хүтэлбэрилэгшэ Виталий Сучков Буряад Улас тухай гайхалтай, дура буляама орон гэжэ хэлэбэ.
Буряад Уласта Москва хотын үдэрнүүд гэһэн хэмжээ ябуулга соёлой болон ажал хэрэгэй холбоо дэмжэхэһээ гадна, бэшэшье һалбаринуудта дүй дүршэлөөр андалдаха арга боломжо олгоно гэжэ үндэһэтэнэй бодолгын департаментын хүтэлбэрилэгшэ тэмдэглэбэ.
“Байгша ондо Буряад Уласта Москва хотын үдэрнүүдые үнгэргэхэ болоһондоо ехэ баяртайбди”, - гэжэ хэмжээ ябуулгануудай эхилхэһээ урид Виталий Сучков Буряад Уласай ажаһуугшадые амаршалба.
Үндэһэтэнэй бодолгын департаментын хүтэлбэрилэгшын хэлэһээр, Буряад Уласта Москва хотын үдэрнүүд гэһэн хэмжээ ябуулга соёлой болон ажал хэрэгэй холбоо дэмжэхэһээ гадна, бэшэшье һалбаринуудта дүй дүршэлөөр андалдаха, нютаг можонуудай хоорондохи харилсаа бэхижүүлнэ.
- 2016 оной ноябрь һарада Москва хотодо Улаан-Үдын Соёлой үдэрнүүд гэһэн мартагдашагүй хэмжээ ябуулга үнгэрөө. Москвагай ажаһуугшадта Буряад Уласай соёл, урлагай мэдээжэ зүжэгшэд гоё һайхан тоглолтонуудые, найр наадануудые бэлэглээ. Мүнөө Буряад Уласта ажаһуугшадтай соёлой, ажал хэрэгэй дүй дүршэлөөр ниислэл хотын түлөөлэгшэдэй хубаалдаха ээлжээн ерэбэ, - гэжэ Москва хотын үндэһэтэнэй бодолгын департаментын хүтэлбэрилэгшэ Виталий Сучков тэмдэглэбэ.
Буряад Уласта Москва хотын үдэрнүүдтэ зорюулагдаһан һонирхолтой программа бэлдэгдэнхэй. Июлиин 12-то үглөөнэй 11 сагта Илалтын хүшөөгэй дэргэдэ хэмжээ ябуулганууд үнгэргэгдэжэ, удаань Эсэгэ ороноо хамгаалгын Агууехэ дайнда Москва шадархи байлдаанда хабаадаһан Буряад Уласта ажаһуугшадта сертификадууд барюулагдаха. Тиихэдэ Ородой Холбоото Уласай түүхэ, ёһо заншалаар һонирходог, “Минии Москва” гэһэн онлайн-мүрысөөнэй илагшадые шагнаха юм. Тэдэнэртэ Ородой Холбооной ниислэл ошожо хараха аяншалгын путёвконууд барюулагдаха. Удаань Москва хото болон Буряад Улас хоорондохи эдэй засагай, соёлой, ниигэмэй удха шанартай харилсаануудые хүгжөөхэ талаар дүхэриг шэрээнүүд, эрдэмэй-практическа бага хуралнууд эмхидхэгдэхэ.
“Буряад улас – баян соёл, түүхэтэй гайхамшаг орон. Һонирхолтой, аша үрэтэй үдэрнүүд үнгэргэгдэхэ. Буряад Уласта Москва хотын үдэрнүүдтэ бултаниие уринаб”, - гэжэ Виталий Сучков хэлэбэ.
Буряад Уласай Засагай газарай мэдээсэлэй албанһаа гэрэл зураг абтаба.
