​Эблэрэлгэ руу эхин алхам

Һүүлэй жэлнүүдтэ Түнхэн аймагта хэрүүл, хэлэ аман замханагүй. Тэрээнһээ боложо, урдахи засаг даргань болзорһоо урид тушаалаа орхихо баатай болоо һэн. Харин орондонь ерэһэн шэнэ засаг даргада дадажа ядаһан зон эсэргүүсэнэ гэхэһээ эхилээд, элдэб мэдээнүүд ябаа. Эдэ бүгэдые олондо мэдээсэл тараадаг хэрэгсэлнүүд бүри ехээр дэбэргэжэшье болоо. Гэбэшье ямаршье аша үрэгүй энэ ябадалые хүрөө болгое гэжэ уряалhан хандалга Аймагай һунгамалнуудай зүблэлэй түрүүлэгшэ Аламжа Сыренов хэблүүлбэ.

Тэрээн дотор иигэжэ хэлэгдэнэ: «Байгша оной сентябриин 10-да Буряадай ажаһуугшад, тэрэ тоодо Түнхэн аймагай зон, толгойлогшые һунгана. Иигэжэ түүхын шэнэ хуудаһан нээгдэхэ. Хубилалтанууд манай аймагта айхабтар хэрэгтэй. Эсэстээ хүрэшэгүй элдэб эсын хэрэлдээнһээ ажаһуугшаднай эсээ. Хэрүүлэй үзүүртэ - дайн гэлсэдэг. Тиимэһээ энэ хэрэлдээ өөһэдөө эхилээл hэн тула өөһэдөөл эбтэй болохо мүрөө бэдэрэе. Хоёр анги боложа хубааршаһан бидэ Буряад Уласай Толгойлогшын уялгануудые дүүргэгшэ Алексей Цыденовтэй уулзажа харилсаабди. Тэрэ үедэл муугаа дараад, һайнаа үргэхэ тухай бодол түрөө. Урдамнай үшөөшье олон һунгалтанууд хүлеэнэ. Саашадаа эхэ газартаа эб нэгэн ажаһууя! Шэнэ толгойлогшотой хамта шэнэ байдал зохёое…».

Буряад Уласай Толгойлогшын уялгануудые дүүргэгшэ Алексей Цыденов энэ хандалгыень дэмжэжэ байһанаа олондо мэдүүлээ: «Түнхэн аймагта эблэрэлгэ тээшэ эхин алхам хэгдэбэ. Һайн хубилалтанууд хүлеэгдэнэ. Бултанhаа баян аймагнай хэрүүлэй манан соо тунашоод, хүгжэлтын замһаа хадууранхай, төөрижэ байна. Тиихэдэнь эгээлэй юрын зон лэ хохидоно. Аламжа Сыренов өөрынгөө һанамжа сэхэ руунь хэлэбэ. Тон зүб. Эбгүй байдал зарим муу hанаатай зондол хэрэгтэй. Тэдэ юунэйшье түлөө харюусадаггүй аад, бүхы арга шадалаараа һаад ушаруулхыел оролдохо. Харин бодото дээрээ аймагай түлөө гол харюусалга Иван Александрович Альхеев Аламжа Владимирович Сыренов хоёрой ээм мүр дээрэ. Эдэ хоёрнай хүндэтэй, аха заха зонойнгоо заабаряар нютагайнгаа зониие нэгэдүүлэн, Түнхэн аймагаа хүгжөөн үргэхэеэ оролдохол даа».

Артём Федотовой гэрэл зураг.