954
Москва хотодо болон Байгал далай шадар аяншалга хүгжөөхэ талаар, ниислэл хотын Тамирай болон аяншалгын департамент болон уласай Аяншалгын хороон суг ажалаа ябуулха тухай хэлсээ баталха гэжэ шиидхэбэри абтаба. Энэ уулзалга Улаан-Үдэдэ июлиин 12-то үнгэргэгдэһэн байна.
Москва хотын Үндэһэтэнэй бодолгын болон можонуд хоорондын харилсаануудай департаментын хүтэлбэрилэгшэ Виталий Сучковой хэлэһэнэй ёһоор, Буряад уласта Москва хотын үдэрнүүд гэһэн хэмжээ ябуулгада хоёр можонуудай хүгжэлтын талаар ябуулха ажал элирхэйлэгдэхэ. Тиимэһээ тэрэнэй дүнгүүдээр программа зохёогдожо, намартаа бэлэн болохо юм.
“Ганса соёлой һалбарида дүй дүршэлөөрөө хубаалдаха бэшэ, харин саашадаа эдэй засагай, аяншалгын болон бусад һалбаринуудта, хоёр талада аша үрэтэйгөөр ажалаа ябуулбал һайшаалтай. Жэшээлбэл, Москвагай ажаһуугшадые Байгал далай, Буряад уласаар аяншалха талаар ажал ябуулха. Байгал далай, буряад, эвенк, шэмээшэгүүдэй ажабайдал, ёһо заншал, соёл гэхэ мэтэ Буряад Уласта һонирхохо юумэн олон. Тиихэдэ Москвагай тамиршад манай улас ерэжэ, бэеэ һорихо, элүүржэхэ аргатай”, - гэжэ Алексей Цыденов хэлэбэ.
Буряад Уласта Москва хотын үдэрнүүдэй хэмжээндэ энэ дүхэриг шэрээ үнгэргэгдэбэ. Мүнөөдэр ниислэл хотын түлөөлэгшэд Кабанск аймагай Селенгинск һууринда хэмжээ ябуулгада хаабаадаха.
Буряад Уласай Засагай газарай мэдээсэлэй албанһаа гэрэл зураг абтаба.
