891
Ород болон Монгол гүрэнэй хоорондохи харилсаа хүгжөөлгэдэ Буряад Улас онсо һуури эзэлнэ гэжэ Ородой Холбоото Уласай Юрэнхылэгшын туһалагша Игорь Левитин хэлэбэ.
Монголой Уласай Юрэнхылэгшын тушаалда Халтмаагийн Баттулгын тангаригаа үгэхэ ёһололдо тэрэ хабаадажа, удаань хүршэ гүрэнүүдэй түлөөлэгшэд албанай хэрэгээр уулзаһан байна. Игорь Левитинэй хэлэһэнэй ёһоор, Ород болон Монгол гүрэнүүдэй худалдаа наймаанай эрьесэ, логистикын хангалгын байгуулга хүгжөөхэ хэрэгтэй.
“ Ород болон Монгол гүрэнүүдэй хоорондо харилсаа хүгжөөлгэдэ Буряад Улас онсо һуури эзэлнэ. Түмэр болон машинын ябаха харгын барилга, аяншалга хүгжөөлгэ болон хүдөө ажахын һалбарида нягта харилсаха гэһэн холын хараата түсэбүүд бии. Буряад Улас хүрэтэр машинын ябаха харгын зурууд олон болгохо тухай дурадхалнуудые Монголой түлөөлэгшэд оруулаа”, - гэжэ Игорь Левитин хөөрэбэ.
Ород болон Монгол гүрэнүүдэй худалдаа наймаанда байһан мүнгэнэй эрьесэ 1 млдр доллар болодог, тэрэниие саашадаа улам дээшэлүүлхэ тухай Ородой Холбоото Уласай Юрэнхылэгшын туһалагша тэмдэглэбэ.
“Монгол гүрэнһөө эд бараа оруулха арга боломжонууд ехэ. Харин тэрэнэй сертификациин талаар асуудалнууд гарана. Ородой Холбоото Уласай Хүдөө ажахын яамантай харилсаа үргэдхэхэ тухай Халтмаагийн Баттулга хэлэһэн байна. Тиихэдэ Монголой хүтэлбэрилэгшэ Ород гүрэнтэй нягта харилсажа, ажалаа ябуулхаар шэглэнхэй”, - гэжэ Игорь Левитин хэлэбэ.
Хитадһаа Ородой Холбоото Улас хүрэтэр Монголой газар дайдаар гарадаг ашаа шэрэлгэ дэмжэхэ, Монголһоо эд бараа оруулха боломжо үргэдхэхэ талаар Халтмаагийн Баттулга анхаралаа хандуулна Игорь Левитин хэлэбэ.
Буряад Уласай Толгойлогшын уялгануудые дүүргэгшэ Алексей Цыденов Монголой Юрэнхылэгшэ Халтмаагийн Баттулгатай уулзаха үедөө, хүршэ гүрэнүүдэй хүгжэлтын талаар асуудалнуудаар зүбшэн хэлсэбэ.
“Элшэ хүсэнэй, хүдөө ажахын асуудалнуудаар, тодорхойлбол, Буряад Уласта үүлтэртэ хонидые асарха, аяншалга хүгжөөхэ гэһэн асуудалнуудаар зүбшөөбди. Хитадһаа Улаан-Үдэ хүрэтэр Улаан-Баатараар гараха аяншалгын поезд, самолёдоор ниидэн ошохо һалбари хүгжөөлгэ тухай хэлсээбди. Хоёр гүрэнүүдэй хүгжэлтэдэ аша үрэтэйгөөр ажалаа ябуулха талаар һанамжанууднай таралдана”, - гэжэ Алексей Цыденов хэлэбэ.
Буряад Уласай Засагай газарһаа гэрэл зураг абтаба.
