762
Ородой Холбоото Уласай Гүрэнэй Дүүмэ “Гэр барилгада мүнгэеэ оруулжа, мэхэлүүлэгдэһэн хүнүүдэй эрхэ хамгаалха талаар тохёолдоһон байдал тухай” гэһэн шэнэ хуулиин түсэл хаража үзэхэ тухай бэшэг нютаг можонуудта эльгээһэн байна.
Тэрэ бэшэгэй шухала асуудалнуудай нэгэн хадаа компенсациин жаса байгуулга хэрэгтэй гү, байгуулагдаа һаа, ямар аргаар тэрэнэй ажал ябуулагдахаб тухай Буряад Уласай Засагай газарай түлөөлэгшэд, Арадай Хуралай һунгамалнууд болон олониитын ажаябуулагшад зүбшэн хэлсэхэ. Удаань өөрынгөө нютаг можодо таараһан шиидхэбэринүүдые абажа, тэрэниие Гүрэнэй Дүүмын хараада эльгээхэ болоно.
Буряад Уласай Арадай Хуралай Эдэй засагай бодолгын,байгаалиин нөөсэнүүдые ашаглалгын болон оршон тойронхиие хамгаалгын талаар хорооной түрүүлэгшэ Анатолий Кушнарёвой хэлэһэнэй ёһоор, энэ бэшэг июлиин 11-дэ ерэһэн байна.
“1-2-дохи уншалгануудта энэ хуули абтаһан байна. Мүнөө нютаг можо бүхэн компенсациин жаса байгулха тухай һанал бодолоороо хубаалдаха болоно. Гэр байрын барилгада мүнгэ оруулжа, мэхэлүүлэгдэһэн хүнүүдэй асуудалаар нютаг, можонуудай засагай эмхи зургаанууд ямар ажал ябуулжа байһан тухайгаа тоосохо юм”, - гэжэ Анатолий Кушнарёв тэмдэглэбэ.
Энэ хуулиин ёһоор, баригдаха гэрэй үнэ сэнһээ 1,2 хубиһаа бага бэшэ мүнгэ барилга хэгшэд компенсациин жасада түлэхэ болоно. Барилгын тусхай эрилтэнүүдтэ таараһан, шэлэн абалгын шата гаража, олон байратай гэрнүүдэй барилга хэхэ эмхи элирүүлэгдэхэ юм. Ажаһуугшадай мүнгэеэ оруулһан гэрэй барилгада дүүргээгүйдөө, барилгашад ондоо барилга эхилхэ ёһогүй гэжэ Арадай Хуралай Эдэй засагай бодолгын,байгаалиин нөөсэнүүдые ашаглалгын болон оршон тойронхиие хамгаалгын талаар хорооной түрүүлэгшэ тайлбарилба.
Мүнөө дээрээ Буряад Уласта ажаһуугшадай мүнгэеэ оруулһан 25 гэрнүүд баригдажа байна. Тэдэнэй 19 гэртэ хэлсэгдэһэн болзортоо ажал дүүргэгдээгүй.
