​Арадай Хурал Галина Ковалёвае дэмжэбэ

Галина Ковалёвае Буряад Уласай прокуророй тушаалда томилхыень Буряад Уласай Арадай Хурал һайшаан дэмжэбэ.

Мүнөөдэр үнгэрһэн ээлжээтэ бэшэ сесси дээрээ уласай парламент энэ асуудал хаража үзөөд, сессиин хүдэлмэридэ хабаадаһан арадай 52 һунгамалнуудай 51-ниинь зүбшөөжэ, нэгэниинь буруушаажа дуугаа үгэһэн байна гээд “Буряад Үнэн” мэдэсээлэй албан дуулгана.

Манай уласай прокурор байһан Валерий Петровой Ородой Холбоото Уласай сэрэгэй ахамад прокуророор июниин 28-да томилогдоһоной һүүлдэ, энэ һарын 5-да Ородой Холбоото Уласай Юрэнхы прокурор Юрий Чайка Галина Ковалёвае орондонь оруулха тухай мэдүүлжэ, Арадай Хуралай зүбшөөл абаха зорилготойгоор тусхай бэшэг эльгээгээ юм гэжэ һануулая.

Мүнөөдэр үнгэрһэн ээлжээтэ бэшэ сессидэ Галина Ковалёвада һунгамалнууд нэгэшье асуудал табингүй, гансал саашанхи ажалдаа амжалтатай хүдэлхыень хүсэжэ, үреэлэй үгэнүүдые хэлэһэн байха юм.

Харин уласай прокуророй тушаал эзэлхэеэ байһан Галина Ковалёва һунгамалнуудай дуугаа үгэһэнэй удаа харюу үгэ хэлэхэдээ, тэдэндэ баяраа мэдүүлээд: “Хэрбэеэ уласай прокуророй тушаалда томилогдоо һаа, танай дэмжэлгые дээрэ сэгнэн харюулха гэжэ оролдохоб. Мүнөөдэр танай хэлэһэндэ, илангаяа һунгалтын асуудалаар, харюусаха болоо һаа, иимэ: прокурор хадаа хамаг фракцинуудай, намуудай болон политическэ нэгэдэлнүүдэй урда прокурор лэ юм. Хуулита ёһоор, үнэн зүбөөр, сэхэ сэбэрээр һунгалта үнгэргэхэ гээшэ – манай гол зорилго мүн”, - гэжэ тэмдэглээ.

Буряад Уласай Прокуратурын архивһаа гэрэл зураг абтаба.