757
2017 оной июлиин 26-30-най үдэрнүүдтэ Буряад Уласта “Байгал Бүхэдэлхэйн байгаалиин баялиг: хорин жэл үнгэрһэнэй удаа” гэһэн Уласхоорондын хуралдаан эмхидхэгдэхэ.
Байгал далай дэлхэйн баялиг гэжэ 20 жэлэй саана тоологдодог болоһон юм. Тиимээһээ энэ ойдо зорюулагдаһан хуралдаанда Ородой Холбоото Уласай Байгаалиин нөөсэнүүдэй сайд Сергей Донской хабаадалсаха юм.
«Ородой Холбоото Уласай Юрэнхылэгшэ Владимир Путинай тогтоолоор 2017 он байгаали хамгаалгын болон байгаалиин харууһатай онсо газарнуудай жэл юм. Мүнөө жэл Буряадта ойн баярнууд тэмдэглэгдэнэ. 100 жэлэй саана Ород гүрэн дотор Баргажанай эгээл түрүүшын дархан газар байгуулагдаһан юм. Байгаали хамгаалгын хэмжээ ябуулганууд Байгал далайн эрьедэ бэелүүлэгдэжэ эхилээ гэхэдэ алдуу болохогүй. 20 жэлэй саана Байгал далай ЮНЕСКО эмхиин бүридхэлдэ оруулагдажа, байгаалиин баялиг гэжэ тоологдодог болоо. Энэ ойдо “Байгал Бүхэдэлхэйн байгаалиин баялиг: хорин жэл үнгэрһэнэй удаа” гэһэн уласхоорондын хуралдаан зорюулагдана», - гэжэ Буряад Уласай Байгаалиин нөөсэнүүдэй сайдай уялгануудые дүүргэгшэ Юрий Сафьянов хөөрэбэ.
Ородой Холбоото Уласай Федерациин Зүблэлэй гэшүүд, Гүрэнэй Дүүмын һунгамалнууд, эрдэмэй болон олониитын эмхи зургаанууд, федеральна болон нютаг можонуудай засаг зургаанай түлөөлэгшэд, Хитад, Монгол, Япони, Франци гүрэнүүдэй делегацинууд энэ хуралдаанда хабадаха юм.
“Байгал: Асари ехэ гүрэнэй асари ехэ нуур” гэһэн түсэл бэелүүлгэ, байгаалиин харууһатай онсо газарнуудые хүгжөөлгэ, Байгал далайн онсо шухаг экосистемэ аршалха талаар хуралдаанда хэлсэхэ. Тиихэдэ Загарай аймагай “Талын нүүдэлшэн” гэһэн этнокомплексдо хуралдаанай талмай эмхидхэгдэхэ, Байгал шадарай аймагай Түрхэ һууринай “Байкальская гавань” гэһэн эдэй засагай онсо газарта хуралдаанда хабаадагшад хүрэхэ юм.
kremlin.ru сайтһаа гэрэл зураг абтаба.
