942
Транссибириин түмэр замай хангалгын байгууламжын шэнэдхэлгэ 2020 ондо дүүрэхэ гэжэ Ородой Холбоото Уласай Засагай газарай Түрүүлэгшын орлогшо, хуби ниилүүлһэн нээмэл “РЖД” бүлгэмэй захиралнуудай зүблэлэй түрүүлэгшэ Аркадий Дворкович үсэгэлдэр үнгэргэгдэһэн зүблөөндэ хэлэбэ.
“Транссибириин харгын шэнэдхэлгэ бэелүүлгын түсэл 2019-2020 онуудта дүүрэхэ. Ород гүрэнэй үндэһэтэнэй һайн байдалай жасын мүнгэн һомологдоһон юм”, - гэжэ Аркадий Дворкович тэмдэглэбэ.
Байгал-Амарай магистраль болон Транссибириин түмэр харгы нэгэдүүлхэ Могзон – Новый Уоян гэһэн түсэл тухай асуудал РЖД” бүлгэмдэ дахин һэргээгдэбэ. Мүнөө дээрээ энэ түсэл бэелүүлхэ арга боломжонууд тухай “хэлсэгдэнэ.
“Могзон-Новый Уоян гэһэн түмэр харгын түсэлэй техническэ-эдэй засагай талаар үндэһэ баримтатай болгохо үүсхэл “РЖД” бүлгэм гаргаба. Энэ талаар ажал хэгдэбэл, БАМ болон Транссибириин түмэр харгыда поезднүүдые хубаарилан шэглүүлхэбди. Тэрэнэй удаа барилгын болзор тухай хэлэгдэхэ”, - гэжэ Буряад Уласай Толгойлогшын уялгануудые дүүргэгшэ, хуби ниилүүлһэн нээмэл “РЖД” бүлгэмэй захиралнуудай зүблэлэй гэшүүн Алексей Цыденов хэлэбэ.
Байгша оной июлиин тэн багта Эрхүү хотодо үнгэргэгдэһэн Ородой Холбоото Уласай түмэр харгын захиралнуудай XIII-дахи ассамблеиин үедэ Буряад Уласай Толгойлогшын уялгануудые дүүргэгшэ Алексей Цыденов болон “РЖД” бүлгэмэй юрэнхылэгшэ Олег Белозеров дээрэ хэлэгдэһэн түсэл тухай хэлсэһэн байна.
Могзон Новый Уоян хоёрой хоорондохи зай 700-аад модон болодог. 1980-аад онуудта Могзонһоо “Озёрное” гэһэн полиметаллнуудай уурхай хүрэтэр түмэр харгы баригдажа эхилһэн юм. Мүнгэнэй дуталдаһанһаа боложо, энэ түсэл дүүрэн бэелүүлэгдээгүй.
