768
2017 оной апрелиин 28-да Байгал шадарай аймагай Черёмушки тосхон түймэртэ абтажа, тэндэхи ажаһуугшад орохо, байрлаха гэрнүүдгүй болоһон юм гэжэ һануулнабди. Мүнөө тэндэ гэрнүүд бодхоогдожо, хушагдажа, шэрдэгдэжэ, будагдажа байна.
Ородой Холбоото Уласай Юрэнхылэгшын Сибириин федеральна тойрогто Бүрин эрхэтэ түлөөлэгшэ Сергей Меняйло Черёмушкида хэгдэжэ байһан ажалнуудые шалгаба.
- Ажал һайнаар эмхидхэгдэхэдээ, үрэ дүнтэй байдаг. Буряад Уласта хэгдэжэ байһан ажал хараад байхадаа, Ородой Холбоото Уласай Юрэнхылэгшэ Владимир Путинай даабари саг соогоо һайн шанартайгаар дүүргэгдэнэ гэжэ тэмдэглэхээр, - гэжэ Сергей Меняйло хэлэбэ.
Түймэртэ хохидоһон хүнүүд заатагүй гэртэй болохо гэжэ Бүрин эрхэтэ түлөөлэгшэ тэмдэглэбэ. 19 гэр бүлэдэ хэрэгтэй туһаламжа үзүүлэгдэнэ. Ондоо тосхондо гэр байратай болохоёо хүсэһэн дүрбэн гэр бүлэдэ мүнгэн тэдхэмжэ үзүүлэгдэһэн байна. Мүнөө Черёмушки тосхондо 15 гэрнүүд бодхоогдоо. Сонхонууд табигдажа, табан гэртэ шэрдэлгэ будалгын ажалнууд хэгдэбэ. Тиихэдэ юһэн гэртэ заһабарилгын ажалнууд эхилэнхэй, хорой хашаа ббаригдана. Сентябриин 1 болотор бүхы барилга хэгшэд ажалаа дүүргэхэ түсэбтэй.
“Буряад Уласай Засагай газар барилгын ажалнуудые сентябриин нэгэн болотор дүүргэхэ гэжэ болзор табинхай. Намарай түрүүшын үдэр үхибүүд һуургуули, хүүгэдэй сэсэрлиг ошохо болотор бүхы ажал хэгдэхэ ёһотой. Ородой Холбоото Уласай Юрэнхылэгшын даабари дүүрэн бэелүүлэгдэхэ, ажаһуугшад хуулиин ёһоор тэдхэмжэдэ хүртэхэ”, - гэжэ Сергей Меняйло тэмдэглэбэ.
Черёмушки һууринда уласай шалгалтын комисси байгуулагдажа, үдэр бүри хэгдэжэ байһан ажал тухай тэдэнэр Алексей Цыденовтэ тоосодог юм. Тиихэдээ барилгын шанар заатагүй шалгагдадаг.
Олоной туһаламжаар ехэ хэрэг бүтэбэ
Буряад Уласай ажаһуугшад гай тодхорто ороһон хүнүүдтэ арга болмжоороо туһалаа гэжэ Алексей Цыденов хэлэбэ. Һайн дураараа хүнүүд сугларжа, дүрбэн үдэрэй туршада Байгал шадарай аймагай Черёмушки тосхондо түймэрэй хойшолонгуудые усадхажа, бог шорой, гэр байрануудай үлэгдэлнүүдые арилгаһан байна. Тэдэнэр хахад һараһаа бага болзорто галда хохидоһон тосхонһоо153 машина бог шорой гаргаа.
“Гремячинское” гэһэн һомоной дарга Оксана Тришкинагай хэлэһэнэй ёһоор, Буряад Уласай ажаһугшад 1,6 миллионһоо дээшэ мүнгэ эльгээгээ. Ороһон мүнгэ түймэртэ хохидогшод өөһэд дундаа хубаажа абаһан байна. Тиихэдээ тэдэнэр энэ хэрэгтэ үнэн сэхээр хандажа, ехээр хохидоһон, жаа, нарай үхибүүтэй айлнуудта мүнгэ ехээр хубаарилаа. Черёмушки тосхоной ажаһугшадта мүнгэ һомолхоһоо гадуур, гэрнүүдэй барилгада спонсорнууд туһалаа.
Черёмушки тосхоной үхибүүд болон залуушуул кружок, секцинүүдтэ клубта ябадаг байгаа. Мүнөө галда абтаһан байшанай орондо, клуб дахинаа бодхоогдожо байна гэжэ Буряад Уласай Толгойлогшын уялгануудые дүүргэгшэ Алексей Цыденов тэмдэглэбэ.
Тиихэдэ дансануудай талаар шиидхэхэ асуудалнууд гараһан байна. Зарим хүнүүд Черёмушки тосхондо байрладагшье һаа, тэндэ ажаһуудаг гэжэ дансагүй байгаа. Зарим айлнуудай гэр байрын үнэмшэлгэнүүд түймэртэ дүрэшөө. Тиигэбэшье эдэ асуудалнууд сүүдтэ шиидхэгдээ.
- Хүнүүд сүүдтэ хандажа, Черёмушки тосхондо ажаһуудаг тухай гэршэлхэ баатай болоо. 22 хандаһан хүнүүдэй, 18 хүнүүдэй асуудал хуулиин ёһоор шиидхэгдээ. Сүүдэй шиидхэбэриин хуулита ёһондоо ороходо, бидэ тэдэниие бүридхэлдэ оруулхабди. Удаань ажаһуугшад федеральна бюджетһээ зуу зуу мянган түхэриг абаха. Гэрнүүдэй барилгада Буряад Уласай бюджетһээ 20 млн түхэриг һомологдоо, - гэжэ һомоной дарга хэлэбэ.
Ородой Холбоото Уласай Бүрин эрхэтэ түлөөлэгшэ Сергей Меняйло энээнһээ урид Буряад Улас майн 18-да албанай хэрэгээр ерэхэдээ, Черёмушки тосхондо тохёолдоһон байдал хараһан байна гэжэ һануулнабди.
Буряад Уласай засаг зургаан түймэртэ гэр байраяаа алдаһан хүнүүдтэ туһа хүргэхэ гэжэ Толгойлогшын уялгануудые дүүргэгшэ Алексей Цыденов тихэдэ хэлэһэн байха юм.
- Гэрнүүдые барилгын ажал һайнаар ябуулагдана. Болзор соогоо барилга дүүрэхэ, - гэжэАлексей Цыденов мүнөө тэмдэглэбэ.
Ородой Холбоото Уласай Юрэнхылэгшэ Владимир Путин Байгал шадарай аймагай Черёмушки һууринда гэр барилга, тэндэхи ажаһуугшадта туһаламжа үзүүлхэ гэхэ мэтые өөрын хиналта доро абанхай юм. Тиихэдэ Владимир Путин Ородой Холбоото Уласай Засагай газарта Буряад Уласай засаг зургаанда энэ талаар туһа хүргэхэ даабари үгэһэн байна гэжэ тэмдэглэлтэй.
